शिरूर: पुणे विभाग शिक्षक मतदारसंघाच्या विधान परिषद निवडणुकीसाठी शुक्रवारी (ता.२३) मतदान होणार असून, मतदानापूर्वीच पुणे जिल्ह्यासह शिरूर तालुक्यात कथित लक्ष्मीदर्शनाची जोरदार चर्चा रंगली आहे. दिवाळीला अवघे काही दिवस शिल्लक असताना शिक्षक मतदारांवर पैशांचा वर्षाव झाल्याची चर्चा राजकीय वर्तुळात सुरू असून, या कथित प्रकारामुळे निवडणुकीच्या पारदर्शकतेबाबत प्रश्नचिन्ह निर्माण झाले आहे. मतदारांना आकर्षित करण्यासाठी पैशांचा वापर होत असल्याच्या चर्चेमुळे ‘मास्तर, हे वागणे बरे नव्हे!’ असे म्हणण्याची वेळ सर्वसामान्य नागरिकांवर आली आहे.
पुणे जिल्ह्यासह शिरूर तालुक्यात काही शिक्षक मतदार संघातील उमेदवारांकडून शिक्षक मतदारांना प्रत्येकी १० हजार रुपये दिल्याची जोरदार चर्चा सुरू आहे. शिरूर तालुक्यातील सर्व ६१६ शिक्षक मतदारांना पैशांचे वाटप झाल्याची माहितीही चर्चेत आहे. मात्र, शिक्षकांसारख्या समाजाला दिशा देणाऱ्या घटकाच्या निवडणुकीतच पैशांच्या वापराची चर्चा सुरू झाल्याने या प्रकाराबाबत आश्चर्य व्यक्त केले जात आहे.
पुणे विभाग शिक्षक मतदारसंघात पुणे, सातारा, सांगली, कोल्हापूर आणि सोलापूर या पाच जिल्ह्यांचा समावेश आहे. या विभागात एकूण ६१ हजार ९४० शिक्षक मतदार असून, त्यापैकी पुणे जिल्ह्यात सर्वाधिक १६ हजार ८२२ मतदार आहेत. त्यामुळे या निवडणुकीत पुणे जिल्ह्यातील मतदारांची भूमिका महत्त्वाची मानली जात आहे. त्यातही शिरूर तालुक्यातील ६१६ शिक्षक मतदारांकडे उमेदवारांचे विशेष लक्ष लागले आहे.
शिरूर तालुक्यात सहा मतदान केंद्रांवर मतदानाची व्यवस्था करण्यात आली आहे. न्हावरे येथील मतदान केंद्रावर ५६, पाबळ येथे १०३, शिरूर येथे २७८, टाकळी हाजी येथे ४६, तळेगाव ढमढेरे येथे ९४, तर वडगाव रासाई येथील मतदान केंद्रावर ३९ शिक्षक मतदार आहेत. अशा प्रकारे तालुक्यातील एकूण शिक्षक मतदारांची संख्या ६१६ आहे. या मतदारांचा कौल कोणाच्या बाजूने जाणार, याकडे राजकीय वर्तुळाचे लक्ष लागले आहे.
या निवडणुकीत भाजपचे कौस्तुभ गावडे, काँग्रेसचे विद्यमान आमदार प्रा. जयंत आसगावकर, सचिन सानप आणि अपक्ष उमेदवार दत्तात्रय सावंत यांच्यात प्रमुख लढत होत आहे. भाजपचे कौस्तुभ गावडे आणि काँग्रेसचे जयंत आसगावकर यांच्यातील लढतीकडे विशेष लक्ष दिले जात असून, इतर उमेदवारांमुळेही निवडणुकीतील चुरस वाढली आहे.
शिक्षक हा समाजाचा मार्गदर्शक आणि भावी पिढी घडविणारा महत्त्वाचा घटक आहे. त्यामुळे शिक्षक मतदारसंघाच्या निवडणुकीत वैचारिक भूमिका, शैक्षणिक प्रश्न, शिक्षकांचे प्रलंबित प्रश्न आणि विकासाच्या मुद्द्यांना प्राधान्य मिळणे अपेक्षित आहे. मात्र, मतदानापूर्वीच पैशांच्या कथित वाटपाची चर्चा सुरू झाल्याने या निवडणुकीच्या नैतिकतेवर प्रश्न उपस्थित होत आहेत. आता शिक्षक मतदार पैशांच्या आमिषाला महत्त्व देतात की उमेदवारांची कार्यक्षमता, भूमिका आणि शिक्षकांच्या प्रश्नांवरील बांधिलकीला प्राधान्य देतात, हे मंगळवारी (ता.२७) बालेवाडी (पुणे) येथे होणाऱ्या मतमोजणीतून स्पष्ट होणार आहे.
“२३ ते २५ हजार मतांचा टप्पा गाठल्यास विजय निश्चित”…..
“२३ ते २५ हजार मतांचा टप्पा गाठल्यास विजय निश्चित असल्याचा अंदाज शिक्षक मतदार संघातील उमेदवारांना असल्यामुळे शिक्षक मतदारसंघाच्या निवडणुकीत मोठ्या प्रमाणावर ‘लक्ष्मीदर्शन’ झाल्याची जोरदार चर्चा आहे. मतांचा विजयी आकडा गाठण्यासाठी प्रमुख उमेदवारांकडून जोरदार प्रयत्न सुरू असल्याची राजकीय वर्तुळात चर्चा आहे.
