मुंबई : डोंबिवलीतील शास्त्रीनगर रुग्णालयातील डॉक्टर आणि नर्स मारहाण प्रकरणातील मुख्य आरोपी आणि नगरसेवक रमेश म्हात्रे यांच्या प्रकृतीबाबत मोठी बातमी समोर आली आहे. कल्याणच्या आधारवाडी कारागृहात बंदिस्त असताना त्यांची प्रकृती अचानक बिघडल्यामुळे खळबळ उडाली आहे.
मिळालेल्या माहितीनुसार, कारागृहात अचानक प्रकृती खालावल्याने तुरुंग प्रशासनाची तारांबळ उडाली. तातडीने हालचाली करत त्यांना उपचारासाठी उल्हासनगरच्या सेंट्रल हॉस्पिटलमध्ये दाखल करण्यात आले असून सध्या तिथे त्यांच्यावर डॉक्टरांच्या देखरेखीखाली उपचार सुरू आहेत. मात्र, त्यांना नेमका काय त्रास झाला आणि त्यांची प्रकृती सध्या कशी आहे, याविषयीची कोणतीही अधिकृत माहिती अद्याप समोर आलेली नाही.
काही दिवसांपूर्वीच सर्वोच्च न्यायालयाच्या आदेशानुसार रमेश म्हात्रे यांनी आत्मसमर्पण केले होते. त्यानंतर न्यायालयाच्या निर्देशानुसार त्यांची रवानगी कल्याणमधील आधारवाडी कारागृहात करण्यात आली होती. त्यांच्यावर कायदेशीर प्रक्रिया सुरू असतानाच ही प्रकृती बिघडल्याची घटना घडली आहे.
डोंबिवलीतील शास्त्रीनगर शासकीय रुग्णालयात वैद्यकीय अधिकारी आणि परिचारिकांना मारहाण झाल्यामुळे राज्यभरातून संताप व्यक्त करण्यात आला होता. या गंभीर प्रकरणामुळे वैद्यकीय क्षेत्रात तीव्र पडसाद उमटले होते आणि रमेश म्हात्रे सतत चर्चेत राहिले होते. आता कारागृहात प्रकृती बिघडल्याने या संपूर्ण प्रकरणाची चर्चा पुन्हा एकदा जोर धरू लागली आहे.
आता रुग्णालय प्रशासन आणि डॉक्टरांकडून रमेश म्हात्रे यांच्या प्रकृतीविषयी नेमकी काय माहिती दिली जाते, याकडे सर्वांचे लक्ष लागले आहे.
