मुंबई : दिवंगत उपमुख्यमंत्री अजित पवार यांच्या विमान अपघात प्रकरणावरून महाराष्ट्राच्या राजकारणात पुन्हा एकदा मोठी खळबळ उडाली आहे. मुंबईतील यशवंतराव चव्हाण सेंटरबाहेर एक रहस्यमय पोस्टर लावण्यात आले आहे.या पोस्टरवर तारीख आणि वेळेचा स्पष्ट उल्लेख असल्याने राजकीय वर्तुळात तर्कवितर्क लावले जात आहेत.
या निनावी बॅनरवर कोणाच्याही नावाचा थेट उल्लेख करण्यात आलेला नाही. मात्र, त्यावर एका मफलरचे चित्र रेखाटलेले दिसत असल्याने राजकीय विश्लेषक आणि कार्यकर्त्यांमध्ये विविध तर्कवितर्क लढवले जात आहेत. ‘अजितदादांच्या अपघातामागील किंवा त्यातील घातपातामागील सूत्रधारांना पाठीशी घालणारा नेता कोण?’ असा थेट आणि बोचरा सवाल या पोस्टरद्वारे उपस्थित करण्यात आला आहे.येत्या 16 नोव्हेंबर रोजी दुपारी 4 वाजता या ठिकाणी नेमकं काय घडणार आणि कोणता नवा गौप्यस्फोट होणार, याकडे आता संपूर्ण महाराष्ट्राचे लक्ष लागले आहे..
राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी अजित पवार यांच्या विमान अपघाताबाबत पुन्हा एकदा खळबळजनक दावा केला आहे. या अपघातात व्हीएसआर कंपनीला पाठीशी घालणारा ‘मफलरवाला नेता’ नेमका कोण आहे, याचा पर्दाफाश लवकरच केला जाईल, असा इशारा त्यांनी दिला होता. हा नेता छगन भुजबळ किंवा अरविंद केजरीवाल नसून दुसराच कोणीतरी असल्याचा दावा त्यांनी आधीच केला आहे.
या प्रकरणातील संबंधित नेत्याचे नाव 10 ऑक्टोबर रोजी जाहीर करणार असल्याचे रोहित पवार यांनी सांगितले होते. मात्र, एमपीएससी विद्यार्थ्यांच्या आंदोलनातील सहभाग आणि त्यानंतर आलेले दसरा व दिवाळी यांसारखे मोठे सण यामुळे नाव जाहीर करण्यास विलंब झाल्याचे राजकीय वर्तुळात बोलले जात आहे.
याच पार्श्वभूमीवर मुंबईतील यशवंतराव चव्हाण सेंटरबाहेर काही गूढ पोस्टर झळकल्याने चर्चांना उधाण आले आहे. हे पोस्टर रोहित पवार यांच्या सांगण्यावरूनच लावण्यात आले असावे, असा अंदाज वर्तवला जात आहे. मात्र, यामागचा खरा सूत्रधार कोण, याबाबत अद्याप कोणतीही अधिकृत माहिती समोर आलेली नाही. त्यामुळे या संपूर्ण प्रकरणावरील गूढ अधिकच वाढले आहे.
रोहित पवार यांनी याआधीही अनेकदा पत्रकार परिषदा घेऊन हा केवळ अपघात नसून घातपात असल्याचा संशय व्यक्त केला आहे. आता यशवंतराव चव्हाण सेंटरमधील पत्रकारिकेनंतर त्या मफलरवाल्या नेत्याचे खरे नाव समोर येणार का, आणि या विमान अपघातामागील सत्य उघड होणार का, याकडे संपूर्ण महाराष्ट्राचे लक्ष लागले आहे.
