पुणे: केंद्रीय गृहमंत्री अमित शहा पुणे दौऱ्यावर येणार आहेत. 15 आणि 16 नोव्हेंबर रोजी दोन दिवसांच्या दौऱ्यात त्यांच्या उपस्थितीत शहर आणि परिसरात विविध कार्यक्रमांचे आयोजन करण्यात आले आहे. या दौऱ्यात उद्योग, सहकार, सामाजिक संस्था आणि ऐतिहासिक वारशाशी संबंधित उपक्रमांचे उद्घाटनही त्यांच्या हस्ते होणार आहे.
रविवारी (15 नोव्हेंबर) अमित शहा भारत फोर्ज लिमिटेडच्या मुंढवा येथील परिसराला भेट देणार आहेत. कंपनीच्या 60 व्या वर्धापन दिनानिमित्त उभारण्यात आलेल्या स्मारक फलकाचे अनावरण त्यांच्या हस्ते केले जाणार आहे. त्यानंतर तळेगाव दाभाडे येथे नॅशनल हेवी इंजिनिअरिंग को-ऑपरेटिव्ह लिमिटेड या बहुराज्यीय सहकारी संस्थेच्या नवीन प्रकल्पाचे भूमिपूजन होणार आहे.
या दौऱ्यात सहकार क्षेत्रासाठीही महत्त्वाचे उपक्रम राबवले जाणार आहेत. केंद्रीय सहकारी संस्था निबंधकांच्या प्रादेशिक कार्यालयाचे आभासी पद्धतीने उद्घाटन करण्यात येणार आहे. तसेच पुणेकरांसाठी भारत टॅक्सी सेवेचा शुभारंभही अमित शहा यांच्या हस्ते होणार आहे.
सोमवारी (16 नोव्हेंबर) सेनापती बापट मार्गावरील भारतीय जैन संघटनेच्या मुख्यालयाला आणि शांतीलाल मुथा फाउंडेशनच्या कार्यालयाला ते भेट देणार आहेत. याच दिवशी जिल्हा परिषद कार्यालयात दिवंगत माजी उपमुख्यमंत्री अजित पवार यांच्या प्रतिमेचे अनावरणही त्यांच्या हस्ते होणार आहे.
दरम्यान, सदाशिव पेठेतील पेरूगेट परिसरातील भारत इतिहास संशोधक मंडळाने तयार केलेल्या मराठा इतिहास डिजिटायझेशन प्रकल्पाचे उद्घाटन करण्यात येणार आहे. यासोबतच इतिहास अभ्यासक आणि नागरिकांना ऐतिहासिक माहिती ऑनलाइन उपलब्ध व्हावी, यासाठी तयार केलेल्या प्रवेश पोर्टलचेही लोकार्पण होईल.
