इम्रान आत्तार
भोर: भोर तालुक्यात नात्यांना काळिमा फासणारी धक्कादायक घटना उघडकीस आली आहे. दोन अल्पवयीन चुलत भावांनी अल्पवयीन चुलत बहिणीवर बळजबरीने अत्याचार केल्याचा आरोप असून, या घटनेत पीडित मुलगी गर्भवती राहिल्याचे समोर आले आहे. पुण्यातील ससून रुग्णालयात प्रसूती झाल्यानंतर हा प्रकार उघडकीस आला. या घटनेमुळे भोर तालुक्यात खळबळ उडाली असून, परिसरातून संताप व्यक्त केला जात आहे. याप्रकरणी पीडित मुलीने १६ ऑक्टोबर रोजी भोर पोलिस ठाण्यात फिर्याद दिली आहे.
जानेवारी महिन्यात अत्याचार झाल्याचा आरोप
भोर पोलिसांनी दिलेल्या माहितीनुसार, पीडित अल्पवयीन मुलीच्या घराशेजारी राहणाऱ्या तिच्या दोन अल्पवयीन चुलत भावांनी जानेवारी २०२६ मध्ये तिला माळरानावर नेऊन दोन ते तीन वेळा बळजबरीने अत्याचार केल्याचा आरोप आहे. या घटनेनंतर पीडित मुलगी घाबरल्यामुळे तिने हा प्रकार बराच काळ कोणालाही सांगितला नव्हता.
दरम्यान, पीडित मुलगी गर्भवती असल्याचे समोर आल्यानंतर या घटनेला वाचा फुटली. उपचारासाठी तिला पुण्यातील ससून रुग्णालयात दाखल करण्यात आले असता, तेथे तिची प्रसूती झाली. त्यानंतर रुग्णालयातील वैद्यकीय अधिकाऱ्यांनी भोर पोलिसांशी संपर्क साधून घटनेची माहिती दिली.
रुग्णालयातून माहिती मिळताच पोलिसांची धाव
घटनेची माहिती मिळताच भोर पोलिस ठाण्यातील अधिकाऱ्यांनी ससून रुग्णालयात जाऊन पीडित मुलीचे जबाब नोंदवले. त्यानंतर तिच्या फिर्यादीवरून प्रकरणाची नोंद करण्यात आली. या प्रकरणाचा पुढील तपास भोर पोलिसांकडून सुरू आहे.
नातेसंबंधांवरील विश्वासाला धक्का
अल्पवयीन मुलीशी संबंधित या गंभीर घटनेमुळे कुटुंबव्यवस्थेतील सुरक्षिततेचा प्रश्न पुन्हा ऐरणीवर आला आहे. जवळच्या नात्यांमधूनच अशा प्रकारचे आरोप समोर येत असल्याने नागरिकांमध्ये चिंता आणि संताप व्यक्त होत आहे. अल्पवयीन मुलांच्या सुरक्षिततेसाठी कुटुंबीयांनी सतर्क राहणे, मुलांना विश्वासात घेणे आणि कोणत्याही संशयास्पद घटनेकडे दुर्लक्ष न करणे आवश्यक असल्याची भावना व्यक्त केली जात आहे. या प्रकरणात पोलिसांचा तपास सुरू असून, आरोपांची सत्यता न्यायप्रक्रियेतून स्पष्ट होणार आहे.
