पुणे (बाणेर) : पुण्यातील बाणेर परिसरात कोट्यवधी रुपये किमतीची जमीन हडपण्याच्या प्रयत्नातून बनावट कागदपत्रांचा वापर केल्याचा प्रकार समोर आला आहे. खोट्या सह्या, बनावट स्टॅम्प पेपर आणि निलंबित नोटरीच्या नावाचा गैरवापर करून जुन्या तारखेचे करारनामे तयार केल्याचा आरोप आहे. या प्रकरणी बाणेर पोलीस ठाण्यात सहा जणांविरोधात फसवणूक आणि बनावट दस्तऐवज तयार केल्याप्रकरणी गुन्हा दाखल करण्यात आला आहे.
या प्रकरणी रामदास हनुमंत सायकर (वय ५७), शकुंतला हनुमंत सायकर (वय ७६), रंजना हनुमंत सायकर (वय ७४), छाया सुनील रासकर (वय ५६, सर्व रा. करंदी, ता. शिरूर), तसेच योगेश पोपटराव कळमकर आणि जीवन पोपटराव कळमकर (दोघे रा. बाणेर) यांच्यावर गुन्हा दाखल झाला आहे. स्नेहल संजय पिंपरकर (वय ५६, रा. औंध) यांनी याबाबत पोलिसांकडे तक्रार दिली आहे.
तक्रारीनुसार, स्नेहल पिंपरकर आणि त्यांच्या पतीने सायकर कुटुंबाकडून बाणेर येथील जमीन नोंदणीकृत खरेदीखताद्वारे पूर्ण पैसे देऊन खरेदी केली होती. जमिनीचा ताबाही त्यांच्याकडे होता. मात्र, या जमिनीवर हक्क सांगण्यासाठी आरोपींनी संगनमत करून १४ सप्टेंबर २००१ या तारखेचा १०० रुपयांचा बनावट करारनामा आणि कुलमुखत्यारपत्र तयार केल्याचा आरोप आहे.
या कागदपत्रांवर नोटरी सतीशकुमार तिवारी यांच्या सही आणि शिक्क्याचा वापर करण्यात आल्याचे तक्रारीत नमूद आहे. माहिती अधिकारातून मिळालेल्या माहितीनुसार, तिवारी यांचे नाव १२ एप्रिल १९९६ रोजीच नोटरी रजिस्टरमधून वगळण्यात आले होते. तसेच, संबंधित स्टॅम्प पेपर विकल्याचे स्टॅम्प विक्रेत्याने नाकारल्याचे आणि दस्तावरील साक्षीदार गणेश काटे यांच्या बनावट सह्या केल्याचा आरोपही करण्यात आला आहे. या प्रकरणाचा पुढील तपास बाणेर पोलीस करीत आहेत.
