अक्षय टेमगिरे
पुणे : शिरूर तालुक्यातील पिंपरी दुमाला येथे रांजणगाव पोलिस ठाण्याचे निरीक्षक कुमार कदम यांनी भेट देऊन गावातील सुरक्षा यंत्रणा, सामाजिक सलोखा आणि सोमेश्वर मंदिराच्या व्यवस्थापनाचा सविस्तर आढावा घेतला. या वेळी आयोजित बैठकीत ग्रामसुरक्षा आणि महिलांच्या सुरक्षेबाबत महत्त्वपूर्ण मुद्द्यांवर सविस्तर चर्चा झाली.
१९९४-९५ च्या दरोड्यानंतर पिंपरी दुमाला गावात कोणतीही मोठी गंभीर गुन्हेगारी घडलेली नाही, ही अत्यंत कौतुकास्पद बाब असल्याचे PI कुमार कदम यांनी नमूद केले. गावातील ही शांतता, सांस्कृतिक परंपरा आणि सामाजिक सलोखा टिकवून ठेवण्यासाठी ग्रामस्थांनी नेहमी सतर्क राहावे, असे आवाहन त्यांनी केले. परिसरातील चोरीच्या घटना रोखण्यासाठी पोलिस गस्त सुरूच आहे; पण त्यासोबतच ग्रामस्थांनीही रात्रीच्या वेळी एकत्र येऊन गस्त घालावी, असा सल्ला त्यांनी दिला.
शाळा-महाविद्यालयात जाणाऱ्या मुली आणि महिलांच्या सुरक्षेबाबत पोलिस प्रशासन पूर्णपणे गंभीर आहे. त्यांच्या सुरक्षेसाठी आवश्यक त्या सर्व उपाययोजना केल्या जातील, असा विश्वास कदम यांनी दिला. तसेच, गावात काही संशयास्पद हालचाली दिसल्यास अथवा अडचण निर्माण झाल्यास तात्काळ 112 या आपत्कालीन क्रमांकावर संपर्क साधण्याचे मार्गदर्शन त्यांनी केले.
कृषीप्रधान असलेल्या या गावात फळबागा आणि कांदा उत्पादन मोठ्या प्रमाणात घेतले जाते. महाशिवरात्री आणि श्रावण महिन्यात सोमेश्वर देवस्थान परिसरात भाविकांची होणारी गर्दी लक्षात घेता वाहतूक व सुरक्षेचे नियोजन करण्यावरही बैठकीत भर देण्यात आला.
या वेळी पत्रकार अर्जुन शेळके,सरपंच महेंद्र डोळस,माजी उपसरपंच शरद खळदकर, देवस्थान समितीचे अध्यक्ष श्रीकांत सोनवणे, माजी देवस्थान अध्यक्ष सुनील सोनवणे, देवस्थान उपाध्यक्ष कैलास पिंगळे, खजिनदार शेखर पाटेकर, पोलिस पाटील संतोष जाधव, ग्रामपंचायत सदस्य अमोल डोळस, माजी उपसरपंच अशोक दुर्गे, बागायतदार कांतीलाल माशेरे, सोमनाथ चिखले, देवस्थान पुजारी सोमनाथ तक्ते, सुभाष बापू डोळस, कारेगाव पोलिस ठाण्याच्या गोपनीय कक्षाचे ब्रह्मा पवार यांच्यासह ग्रामस्थ मोठ्या संख्येने उपस्थित होते
