पुणे : शाळेतून घरी परतणाऱ्या दोन अल्पवयीन अल्पवयीन सख्ख्या बहिणींचा पाठलाग करून त्यांचा विनयभंग केल्याची धक्कादायक घटना पारगाव (ता. दौंड) येथे उघडकीस आली आहे. याप्रकरणी यवत पोलिसांनी तत्परतेने कारवाई करत दोन्ही आरोपींना बेड्या ठोकल्या आहेत.
मिळालेल्या माहितीनुसार, पीडित मुली दररोजप्रमाणे शाळेतून घराच्या दिशेने चालल्या होत्या. २० जुलै आणि २७ जुलै रोजी सायंकाळी ५ वाजताच्या सुमारास पारगाव येथील मुख्य चौकात ही घटना घडली. आरोपी प्रवीण गणपत थोरात आणि दिनेश दत्तात्रय पासलकर (दोघेही रा. खुटबाव, ता. दौंड) यांनी ‘एमएच ४२ बीएस ८५३५’ या क्रमांकाच्या चारचाकी गाडीने पाठलाग करून मुलींचा रस्ता अडवला.
यानंतर आरोपी प्रवीण थोरात याने “तू मला खूप आवडतेस” असे म्हणत फिर्यादीचा हात पकडून तिच्याशी अश्लील वर्तन केले. तर त्याचवेळी गाडीत उपस्थित असलेल्या दिनेश पासलकर याने पीडित मुलीच्या लहान बहिणीचा हात धरून तिला स्वतःकडे ओढण्याचा प्रयत्न केला. या प्रकारामुळे घाबरलेल्या मुलींनी घरी जाऊन घडलेला सर्व प्रकार पालकांना सांगितला.
मुलींच्या तक्रारीवरून यवत पोलीस ठाण्यात आरोपींविरोधात ‘पोक्सो’ कायद्यासह (POCSO) विविध गंभीर कलमांनुसार गुन्हा दाखल करण्यात आला आहे. पोलिसांनी तात्काळ सूत्रे हलवून प्रवीण थोरात आणि दिनेश पासलकर या दोघांनाही अटक केली आहे.
या संपूर्ण घटनेचा पुढील तपास पोलीस उपनिरीक्षक किशोर वागज करत असून, परिसरातील मुलींच्या सुरक्षेचा प्रश्न या घटनेमुळे पुन्हा एकदा ऐरणीवर आला आहे.
