न्हावरे: केडगाव गर्भलिंग निदान व बेकायदेशीर गर्भपात प्रकरणाचा तपास जसजसा पुढे सरकत आहे, तसतसे या रॅकेटचे धागेदोरे पुणे जिल्ह्यातील विविध भागांपर्यंत पोहोचत असल्याचे समोर येत आहे. शिरूर तालुक्यातील न्हावरे परिसरातही या प्रकरणाच्या अनुषंगाने “तो लाडावलेला डॉक्टर नेमका कोण?” या प्रश्नाची जोरदार चर्चा सुरू झाली आहे.
तपास यंत्रणांनी आतापर्यंत दौंड आणि शिरूर तालुक्यातील अनेक डॉक्टर,एजंट आणि मध्यस्थांवर कारवाई केली आहे.काही डॉक्टरांकडून गर्भवती महिलांना विशिष्ट ठिकाणी रेफर करण्यात येत असल्याची माहिती तपासातून समोर येत असल्याने न्हावरे परिसरातील काही अमानवीय वैद्यकीय व्यवहारांबाबतही नागरिकांमध्ये प्रश्नचिन्ह निर्माण झाले आहे.
स्थानिक पातळीवर अनेक दिवसांपासून काही डॉक्टर आणि एजंट यांच्या माध्यमातून संशयास्पद रेफरल साखळी कार्यरत असल्याची चर्चा होत आहे.मात्र,या चर्चांची अधिकृत पुष्टी झालेली नसून संबंधित यंत्रणा या सर्व बाबींची पडताळणी करत आहेत.
दरम्यान,केडगाव प्रकरणात उघड झालेल्या रॅकेटचे जाळे शिरूर, हवेली,बारामती,अहिल्यानगर आणि नाशिकपर्यंत विस्तारल्याचे तपासात समोर आले आहे.त्यामुळे न्हावरे परिसरातील संशयित व्यवहारांचीही कसून चौकशी व्हावी.अशी मागणी नागरिकांकडून होत आहे.विशेष म्हणजे,या संपूर्ण प्रकरणात आतापर्यंत २४ आरोपींना अटक करण्यात आली असून त्यामध्ये डॉक्टर,एजंट,वाहनचालक आणि वैद्यकीय साहित्य पुरवठादारांचा समावेश आहे.त्यामुळे तपासाची व्याप्ती दिवसेंदिवस वाढत आहे.
न्हावरे परिसरातील ‘तो’ लाडावलेला डॉक्टर कोण? त्याचे या प्रकरणाशी काही संबंध आहेत का? त्याच्याकडे महिलांना कोणी आणि का पाठवत होते? या सर्व प्रश्नांची उत्तरे आता तपासातूनच समोर येणार आहेत. तपास यंत्रणा पुढील काळात आणखी काही धक्कादायक खुलासे करू शकतात.अशी चर्चा वैद्यकीय वर्तुळासह नागरिकांमध्ये सुरू आहे.
या पार्श्वभूमीवर,संशयित व्यक्तींची नावे अधिकृत तपासात किंवा कारवाईत समोर येईपर्यंत कोणालाही दोषी ठरविणे योग्य ठरणार नाही. मात्र,या रॅकेटमागील संपूर्ण साखळी उघड करून दोषींवर कठोर कारवाई व्हावी.अशी सर्वसामान्य नागरिकांची अपेक्षा आहे.
