पुणे : पुणे विभाग शिक्षक मतदारसंघाच्या आगामी विधान परिषद निवडणुकीसाठी महाराष्ट्र शिक्षक लोकशाही आघाडीने आपली उमेदवारी जाहीर केली आहे. संघटनेने संस्थाचालक कौस्तुभ मुरलीधर गावडे यांच्या नावावर शिक्कामोर्तब केले आहे. 23 ऑगस्ट रोजी पुणे, सोलापूर, कोल्हापूर, सांगली आणि सातारा या 5 जिल्ह्यांतील इच्छुकांच्या मुलाखती पार पडल्या होत्या. त्यानंतर निवड समितीने शैक्षणिक क्षेत्रातील अनुभव आणि संघटनेशी असलेली बांधिलकी विचारात घेऊन कौस्तुभ गावडे यांची निवड केल्याचे स्पष्ट केले.
या उमेदवारीमुळे संघटनेत मोठा वाद निर्माण झाला असून फूट पडल्याचे चित्र आहे. यापूर्वी राज्याचे मंत्री उदय सामंत यांचे OSD सचिन सानप यांच्या नावाची जोरदार चर्चा होती. सानप हे स्वतः शिक्षक असून त्यांनी उमेदवारीसाठी मुलाखतही दिली होती. मात्र, टीडीएफने त्यांना डावलून बिगर-शिक्षक असलेल्या संस्थाचालकाला पसंती दिल्यामुळे अनेक सदस्यांनी नाराजी व्यक्त केली आहे.
टीडीएफने सुरुवातीला ‘उमेदवार हा मूळ शिक्षकच असावा’ अशी भूमिका घेतली होती. मात्र, प्रत्यक्ष निवडीवेळी या निकषाला हरताळ फासल्याचा आरोप विरोधी गटाने केला आहे. टीडीएफचे माजी अध्यक्ष कानडे सर यांच्या मते, ही अधिकृत उमेदवारी नसून अध्यक्ष जी. के. थोरात आणि कौस्तुभ गावडे यांच्यात झालेल्या गुप्त बैठकीचा हा निकाल आहे.
पुरोगामी विचारांची पार्श्वभूमी असलेल्या या संघटनेने उजव्या विचारसरणीशी संबंधित व्यक्तीला पाठिंबा दिल्याने मूल्यांशी तडजोड केल्याची टीका होत आहे. तसेच, या निर्णयामागे मोठा आर्थिक व्यवहार झाल्याचे गंभीर आरोपही केले जात आहेत.
एकंदरीत, कौस्तुभ गावडे यांच्या उमेदवारीमुळे टीडीएफमधील अंतर्गत वाद चव्हाट्यावर आला असून, आगामी निवडणुकीत याचे पडसाद उमटण्याची शक्यता आहे.
