बीड: बीड जिल्ह्यातील चकलांम्बा पोलीस ठाण्याच्या हद्दीत एका खासगी वाहनचालकाची ५ लाख रुपयांची फसवणूक झाल्याचा धक्कादायक प्रकार समोर आला आहे. शेतात सोन्याचा हंडा सापडल्याचे सांगून एकाने वाहनचालकाला बनावट सोन्याची नाणी विकल्याचे उघड झाले आहे. याप्रकरणी पोलीस आता फरार आरोपीचा शोध घेत आहेत.
1 जानेवारी 2026 रोजी पुण्यात वाहनचालक राजकुमार बापूराव कांबळे (वय 45) यांची ओळख मिलिंद अर्जुन निकाळजे या आरोपीशी झाली होती. पुढे काही दिवसांनी, आरोपीने कांबळे यांना फोन करून आपल्या शेतात सोन्याचा हंडा सापडल्याची बतावणी केली. विश्वास बसण्यासाठी 16 एप्रिल रोजी त्याने कांबळे यांना बीडमधील मालेगाव येथे बोलावून एक नाणे ‘सॅम्पल’ म्हणून दिले. ते नाणे सराफाकडून तपासून घेतल्यावर खरे असल्याचे सिद्ध झाले. यामुळे कांबळे यांचा आरोपीवर पूर्ण विश्वास बसला.
या विश्वासाचा फायदा घेत 19 मे 2026 रोजी कांबळे यांनी आरोपीला 5 लाख रुपयांची रोख रक्कम देऊन 1,000 नाण्यांची पिशवी घेतली. मात्र, उदगीरला पोहोचल्यावर सराफाकडून तपासणी केली असता, ती सर्व नाणी बनावट असल्याचे समोर आले. आपली मोठी फसवणूक झाल्याचे लक्षात येताच कांबळे यांच्या पायाखालची जमीन सरकली.
कांबळे यांनी पैसे परत मिळवण्यासाठी आरोपीच्या गावी जाऊन वारंवार मागणी केली, परंतु आरोपी मिलिंद निकाळजे तिथून पसार झाला. अखेर फसवणूक झाल्याची खात्री पटल्यावर कांबळे यांनी चकलांम्बा पोलीस ठाण्यात फिर्याद दिली असून आरोपीचा शोध सुरु आहे.
