पुणे : महाराष्ट्रावर यंदा दुष्काळाचे गंभीर सावट पसरले आहे. एल निनोच्या प्रभावामुळे पावसाने मारलेल्या ओढीमुळे खरीप आणि रबी दोन्ही हंगामांतील पिकांचे प्रचंड नुकसान झाले आहे. परिणामी बळीराजा मोठ्या आर्थिक अडचणीत सापडला असून पिण्याच्या व शेतीच्या पाण्याची टंचाई निर्माण झाली आहे.या बिकट परिस्थितीचे भान ठेवून डोंबिवलीतील अतिशय लोकप्रिय मानला जाणारा ‘रासरंग’ दांडिया उत्सव यंदा आयोजित न करण्याचा संवेदनशील निर्णय खासदार डॉ. श्रीकांत शिंदे यांनी घेतला आहे.
मिळालेल्या माहितीनुसार, आमदार राजेश मोरे यांनी पत्रकार परिषदेत ही माहिती दिली. दरवर्षी डी.एन.सी. शाळेच्या पटांगणावर डाॅ. श्रीकांत शिंदे फाऊंडेशन आणि नवदुर्गा मित्र मंडळाच्या वतीने या भव्य महोत्सवाचे आयोजन केले जाते. परंतु, यंदा उत्सवावर होणारा संपूर्ण खर्च दुष्काळग्रस्त शेतकरी कुटुंबांना मदत म्हणून दिला जाणार आहे. ही मदत कोणत्या भागात आणि कशी पोहोचवायची, याचे नियोजन सध्या प्रशासनाकडून सुरू आहे.
दरम्यान, नवरात्रातील घटस्थापना, पूजा आणि धार्मिक विधी पारंपरिक पद्धतीनुसार साधेपणाने पार पडतील. या निर्णयामुळे राजकीय व सामाजिक वर्तुळातून श्रीकांत शिंदे यांचे कौतुक होत आहे. दुसरीकडे, राज्यातील भीषण परिस्थिती पाहता शरद पवारांसह इतर विरोधी नेत्यांनी महाराष्ट्र सरकारकडे अधिकृत दुष्काळ जाहीर करण्याची मागणी केली आहे.
यावर मुख्यमंत्री देवेंद्र फडणवीस यांनी स्पष्ट केले की, मान्सूनच्या परतीचा प्रवास सुरू झाल्यावर 5 ऑक्टोबरनंतर राष्ट्रीय आपत्ती प्रतिसाद दलाच्या (NDRF) नियमांनुसार खरिपाच्या नुकसानीचे मूल्यांकन केले जाईल. तर रबी हंगामाची पाहणी मार्च 2027 मध्ये होईल. मात्र, शेतकरी बांधवांना सर्वतोपरी मदत करण्यासाठी शासन पूर्णपणे वचनबद्ध आहे
