उरुळी कांचन, ता. 17 : कोरेगाव मूळ (ता. हवेली) येथील रेल्वेफाटक क्र. 8 वरील उड्डाणपुलाच्या (Uruli Kanchan News ) कामासाठी मंगळवार (ता. 17) पासून सदर गेट बंद करण्यात आले आहे. रेल्वे उड्डाणपुलाच्या कामाबद्दल रेल्वे प्रशासनाने तथा संबंधित ठेकेदाराने ग्रामपंचायत, पोलीस पाटील कार्यालय, तसेच ज्या शेतकऱ्यांच्या जमिनी या पुलासाठी संपादित केल्या जाणार आहेत अशा शेतकऱ्यांना नोटीसा देणे आवश्यक होते, मात्र अशा प्रकारची कोणतीही नोटीस न देताच हे काम सुरु होणार असल्याने बाधित शेतकरी आंदोलनाच्या तयारीत आहेत. (Latest Marathi News)
कोरेगाव मूळ (ता. हवेली) येथील रेल्वे गेट कोणतीही पूर्वकल्पना न देता गेट बंद केले. अचानक बंद केल्याने परिसरात मोठी खळबळ उडाली आहे. विशेष म्हणजे, ज्या शेतकऱ्यांच्या जमिनी या पुलासाठी संपादित केल्या जाणार आहेत, त्यांचे भूसंपादन पूर्ण होण्याआधीच आणि कोणतीही पूर्वकल्पना न देता हा मार्ग बंद करण्यात आल्याने शेतकरी मोठ्या संभ्रमात पडले आहेत. “आमची जमीन अद्याप आमच्या ताब्यात असताना कामाला सुरुवात कशी झाली?” असा संतप्त सवाल आता शेतकरी विचारत आहेत.
रेल्वे उड्डाणपुलाचे काम होणे गरजेचे असले तरी, त्यासाठी ठरलेली कायदेशीर प्रक्रिया धाब्यावर बसवण्यात आल्याचा आरोप शेतकऱ्यांनी केला आहे. नियमानुसार, भूसंपादनाची प्रक्रिया पूर्ण करून, संबंधित शेतकऱ्यांना मोबदला देऊन आणि पूर्वकल्पना देऊनच कामाला सुरुवात करणे अपेक्षित असते. मात्र, गुरुवारी कोणत्याही प्रकारची नोटीस न देता अचानक रेल्वे गेट बंद करण्यात आले.
“भूसंपादन झालेले नाही, आम्हाला कोणताही मोबदला मिळालेला नाही, मग प्रशासनाने उड्डाणपुलाचे काम कागदावरच सुरू केले की काय?” असा प्रश्न उपस्थित होत आहे. उड्डाणपुलासाठी शेतकऱ्यांशी संवाद साधणे गरजेचे होते. मात्र, प्रशासनाने थेट गेट बंद करून शेतकऱ्यांना कोंडीत पकडल्याने शेतकरी वर्गात प्रचंड नाराजी आहे.
दरम्यान, अचानक झालेल्या या कारवाईमुळे कोरेगाव मूळ परिसरात तणावाचे वातावरण असून, प्रशासनाने तातडीने खुलासा करावा अशी मागणी होत आहे.
2013 सालचे रेल्वे उड्डाणपुलाचे 7/12 चे शेरे आधी काढा आणि भूसंपादन करून शेतकऱ्यांना मोबदला द्या त्यानंतरच रेल्वे उड्डाणपुलाचे काम चालू करा. शेतकऱ्यांच्या प्रश्नांकडे दुर्लक्ष केले, तर हे काम रोखून धरणार आहे.
-मुकिंदा काकडे, शेतकरी, कोरेगाव मूळ, ता. हवेली
