मुंबई : शिवसेना ठाकरे गटाचे विभागप्रमुख प्रदीप पूर्णेकर यांच्या हत्येनंतर ठाण्यातील राजकीय वातावरण जोरदार तापले आहे. या प्रकरणात नाव गोवले जात असल्याच्या पार्श्वभूमीवर शिवसेना शिंदे गटाच्या नेत्या आणि ठाण्याच्या माजी महापौर मीनाक्षी शिंदे यांनी पत्रकार परिषद घेऊन आपली पहिली प्रतिक्रिया व्यक्त केली. या वेळी त्यांनी आपल्यावरील सर्व आरोप फेटाळून लावत ठाकरे गटावर जोरदार टीकास्त्र सोडले. मात्र, हत्येच्या वेळी त्या नक्की कुठे होत्या, या प्रश्नावरही त्यांनी भाष्य केले आहे.
प्रदीप पूर्णेकर यांच्या हत्या प्रकरणात मीनाक्षी शिंदे यांच्यावर पूर्णेकर कुटुंबाने आणि ठाकरे गटाने आरोप केले आहेत. काही दिवसांपूर्वीच मीनाक्षी शिंदे, त्यांचे पती आणि आरोपी हे एका इमारतीखाली एकत्रित दिसले असल्याचा दावादेखील पूर्णेकर यांच्या मुलाने केला होता. त्यानंतर मीनाक्षी शिंदे यांच्यावर कटाचे आरोप झाले. पुरवणी एफआयआरमध्ये मीनाक्षी शिंदे यांचे नाव समाविष्ट करण्यात आले. त्यानंतर आज मीनाक्षी शिंदे यांनी आरोप फेटाळताना अनेक मुद्यांवर भाष्य केले.
मीनाक्षी शिंदे म्हणाल्या, “प्रदीप पूर्णेकर हत्या प्रकरणात माझा कोणताही सहभाग नसताना मला केवळ राजकीय सूडबुद्धीने गोवण्यात येत आहे. इथे टाळूवरचं लोणी खाण्याचं काम सुरू आहे. उद्धव ठाकरे आणि आदित्य ठाकरे हे सहानुभूती मिळवून आपला पक्ष वाचव-ण्यासाठी ठाण्यात आले होते. मी शिंदे गटात आहे आणि एक महिला आहे, म्हणूनच मला मुद्दाम टार्गेट केले जात असल्याचा आरोप शिंदे यांनी केला. माझे नाव एफआयआरमध्ये दाखल करण्यासाठी त्यांची धडपड सुरू असल्याचे त्यांनी म्हटले.
दरम्यान मीनाक्षी शिंदे यांना त्या कुठे होत्या, असा थेट प्रश्न विचारला असता मीनाक्षी शिंदे यांनी त्याविषयी अधिक बोलणे टाळले. “या प्रकरणी पोलीस सध्या सखोल चौकशी करत आहेत. मी पोलिसांना तपासात पूर्ण सहकार्य करत असून मला जी काही माहिती द्यायची आहे, ती मी थेट पोलिसांनाच चौकशी दरम्यान देणार आहे,” असे सांगत त्यांनी या प्रश्नाला बगल दिली.
आपली बाजू मांडताना मीनाक्षी शिंदे म्हणाल्या की, या दुर्दैवी हत्येशी माझा दूरवरचाही संबंध नसताना केवळ राजकीय सूडबुद्धीने माझे नाव गोवले जात आहे.. एक महिला लोकप्रतिनिधी म्हणून मला मुद्दाम टार्गेट केले जात असून माझे नाव एफआयआरमध्ये समाविष्ट करण्यासाठी त्यांची धडपड सुरू असल्याचा आरोपही त्यांनी केला.
या संपूर्ण प्रकरणामुळे ठाण्यातील शिंदे गट विरुद्ध ठाकरे गट यांच्यातील संघर्ष आणखी तीव्र झाला असून, पोलीस चौकशीत आता नक्की काय समोर येते याकडे सर्वांचे लक्ष लागले आहे.
