लोणी काळभोर, ता. 24 : हातात लोखंडी कोयता फिरवत येणाऱ्या-जाणाऱ्या नागरिकांना शिवीगाळ आणि धमकावून परिसरात दहशत माजविण्याचा प्रयत्न केल्याच्या आरोपावरून लोणी काळभोर पोलिसांनी कदमवाकवस्ती (ता. हवेली) येथील संभाजीनगर परिसरातून दोन तरुणांना 19 ऑक्टोबर रोजी दुपारी ताब्यात घेतले. या कारवाईत पोलिसांनी कोयता आणि होंडा शाईन दुचाकी असा एकूण 50 हजार 200 रुपयांचा मुद्देमाल जप्त केला.
केशर प्रेम बिशुकर्मा (वय 19, व्यवसाय मजुरी) आणि अभिषेक दत्तराव रूपनर (वय 18, शिक्षण, दोघेही संभाजीनगर, कदमवाकवस्ती) अशी ताब्यात घेतलेल्या तरुणांची नावे आहेत. याप्रकरणी पोलीस हवालदार आण्णा दिलीप माने यांनी सरकारच्यावतीने लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, लोणी स्टेशन पोलीस चौकीच्या हद्दीत गस्त घालत असताना पोलिसांना गुप्त बातमीदारामार्फत माहिती मिळाली. संभाजीनगर परिसरात शाईन दुचाकीवरून फिरणाऱ्या दोघांपैकी मागे बसलेला तरुण हातात कोयता फिरवत नागरिकांना धमकावत असल्याचे, तर दुचाकीवरील दुसरा तरुण ‘आम्ही इथले भाई आहोत, आमच्या नादी लागायचे नाही,’ असे ओरडत असल्याचे या माहितीमध्ये सांगण्यात आले होते. त्यामुळे नागरिक घाबरून रस्ता बदलत असल्याची माहितीही पोलिसांना मिळाली.
या माहितीची वरिष्ठ अधिकाऱ्यांना कल्पना दिल्यानंतर पोलीस उपनिरीक्षक पैठणे यांच्या मार्गदर्शनाखाली पोलिसांनी पंचांसह घटनास्थळी धाव घेतली. व्यंकटेश हाईट्स सोसायटीजवळ संशयित दोघे दुचाकीवर दिसून आले. त्यावेळी मागे बसलेल्या तरुणाच्या हातात कोयता असल्याचे आणि दोघेही मोठ्याने ओरडत असल्याचे पोलिसांच्या निदर्शनास आले. पोलिसांनी त्यांना ताब्यात घेण्याचा प्रयत्न केला असता, त्यांनी पळून जाण्याचा प्रयत्न केल्याचे फिर्यादीत नमूद आहे.
पोलिसांनी दोघांना ताब्यात घेऊन त्यांच्याकडील सुमारे 200 रुपये किमतीचा लोखंडी कोयता आणि अंदाजे 50 हजार रुपये किमतीची होंडा शाईन दुचाकी जप्त केली. या प्रकरणी पोलीस हेड कॉन्स्टेबल आण्णा दिलीप माने यांनी सरकारतर्फे फिर्याद दिली आहे. सार्वजनिक ठिकाणी शस्त्रासह दहशत निर्माण करण्याचा प्रयत्न केल्याच्या या घटनेमुळे परिसरातील नागरिकांच्या सुरक्षिततेचा प्रश्न पुन्हा ऐरणीवर आला आहे.
