मुंबई : मुख्य निवडणूक आयुक्त ज्ञानेश कुमार यांच्यावर झालेल्या कथित निवडणूक गैरव्यवहाराच्या आरोपांवरून कॉकरोच जनता पार्टीने (सीजेपी) कठोर पवित्रा घेतला आहे. पक्षाचे संस्थापक अभिजीत दीपके यांच्या मार्गदर्शनाखाली आज मुंबईतील प्रसिद्ध दादर शिवाजी पार्क येथे मोठ्या निदर्शनाचे आयोजन करण्यात आले आहे. या आंदोलनात देशभरातून तसंच संपूर्ण महाराष्ट्रातून सुमारे 50 हजार युवक आणि तरुण नागरिक सहभागी होतील, असा दावा सीजेपीचे मुंबई समन्वयक प्रणय अहीर यांनी केला आहे.
मुबंईतील दादर शिवाजी पार्क येथील हें आंदोलन आज सायंकाळी 4 ते 7 या वेळेत अत्यंत शांततेच्या मार्गाने पार पडणार आहे . लोकशाहीचा बचाव करण्यासाठी सर्व वयोगटातील नागरिक एकत्र येत असून जनतेचा या मोहिमेला मोठा पाठिंबा मिळत असल्याचं पक्षाच्या कार्यकर्त्यांनी नमूद केलं आहे.आंदोलनात कोणताही गोंधळ किंवा त्रास होऊ नये म्हणून सीजेपीकडून विशेष खबरदारी घेण्यात आली आहे:
या आंदोलनात सुव्यवस्थेसाठी 200 प्रशिक्षित स्वयंसेवकांची स्वतंत्र यादी तयार करून त्यांना तैनात करण्यात आले आहे.निदर्शनाच्या ठिकाणी प्रथमोपचार व वैद्यकीय मदतीसाठी मेडिकल कॅम्प उभारले गेले आहेत.उपस्थितांसाठी पिण्याच्या पाण्याची योग्य व्यवस्था करण्यात आली आहे.
शांतता राखण्यासाठी पोलिसांचे पूर्ण सहकार्य लाभत असल्याचे आयोजकांनी स्पष्ट केले. कोणत्याही प्रकारची हिंसा होणार नाही अशी ग्वाही त्यांनी दिली आहे. सुरक्षेचा उपाय म्हणून पोलिसांनी शिवाजी पार्क परिसरात मोठा बंदोबस्त ठेवला आहे.
दरम्यान, आंदोलनाच्या आदल्या दिवशीच अभिजीत दीपके आणि आशुतोष रांका मुंबईत दाखल झाले होते. गेटवे ऑफ इंडिया परिसरात फलक घेऊन बसलेले असताना मरिन ड्राईव्ह पोलिसांनी दीपके यांना ताब्यात घेतले होते, मात्र चौकशीनंतर त्यांना सोडून देण्यात आले.
