वरवंड, ता. 15: बांधकाम साहित्य पुरवठ्याच्या व्यवहारातील 18 लाख रुपये मागितल्याच्या कारणावरून एका व्यावसायिकाला लाकडी बॅटने मारहाण करून जीवे मारण्याची धमकी दिल्याची घटना घडली आहे. हि घटना वरवंड (ता. हवेली) येथील शिवाजीनगर परिसरात 13 ऑक्टोबर रोजी रात्री सुमारे पावणे आठ वाजण्याच्या सुमारास घडली आहे.
याप्रकरणी गणेश प्रकाश जगताप (वय 27, रा. चैताली पार्क, वरवंड) यांनी याबाबत फिर्याद दिली आहे. त्यानुसार राहुल लहूजी दिवेकर यांच्याविरुद्ध यवत पोलीस ठाण्यात गुन्हा दाखल करण्यात आला आहे. पोलिसांत दिलेल्या माहितीनुसार, जगताप हे बांधकाम साहित्य पुरवठा आणि वाहतुकीचा व्यवसाय करतात. त्यांनी 2025 मध्ये राहुल दिवेकर यांच्या ‘शिव एंटरप्रायजेस’ या नावाने जेव्हीएस कोमाटरको इंडस्ट्रीज प्रा. लि. या कंपनीला स्वतःच्या वाहनांमधून राखेचा पुरवठा केला होता. या मालाचे पैसे कंपनीकडून दिवेकर यांच्या नावावर जमा झाल्याचे जगताप यांनी फिर्यादीत म्हटले आहे. मात्र, आपल्या मालाचे 18 लाख रुपये मिळत नसल्याने ते वारंवार पैशांची मागणी करीत होते.
जगताप यांनी पैशांच्या व्यवहाराबाबत दिवेकर यांना 13 ऑक्टोबर रोजी सायंकाळी फोन केला. त्यानंतर दिवेकर हे जगताप यांच्या दुकानात आले आणि नंतर घरी येऊन चर्चा करण्यास सांगितले. त्यानुसार रात्री सुमारे पावणेआठ वाजण्याच्या सुमारास जगताप हे पत्नी रितू यांच्यासोबत दिवेकर यांच्या घरी गेले. तेथे पैशांच्या व्यवहारावरून चर्चा सुरू असताना वाद निर्माण झाला. फिर्यादीनुसार, दिवेकर यांनी शिवीगाळ करून जगताप यांना हाताने व लाथाबुक्क्यांनी मारहाण केली.
त्यानंतर घराबाहेर असलेली लाकडी बॅट आणून पाठीत, डाव्या खांद्यावर आणि डाव्या हातावर मारहाण केल्याचा आरोप आहे. या वेळी भांडण सोडविण्यासाठी मध्ये पडलेल्या दिवेकर यांच्या आईला ढकलून दिल्याचेही फिर्यादीत नमूद आहे. यावेळी जगताप यांच्या पत्नीला शिवीगाळ करून दोघांनाही घराबाहेर काढण्यात आले. तसेच जगताप यांना जीवे मारण्याची धमकी दिल्याचा आरोप करण्यात आला आहे. या भांडणात जगताप यांच्या गळ्यातील पाच तोळ्यांची सोन्याची साखळी हरवल्याचेही त्यांनी फिर्यादीत म्हटले आहे.
घटनेनंतर जगताप यांनी पाटस पोलीस चौकीत धाव घेतली. पोलिसांनी दिलेल्या सूचनेनुसार त्यांनी वरवंड येथील प्राथमिक रुग्णालयात उपचार घेतल्यानंतर तक्रार दाखल केली. या प्रकरणी यवत पोलीस ठाण्यात भारतीय न्याय संहितेच्या कलम118(1), 115(2), 352 आणि 351(2), (3) अन्वये गुन्हा दाखल करण्यात आला आहे.
