मुंबई : ठाण्यातील बहुचर्चित शिवसेना (ठाकरे गट) विभागप्रमुख प्रदीप पूर्णेकर यांच्या हत्या प्रकरणात एक महत्त्वाची माहिती समोर आली आहे. या खळबळजनक प्रकरणाची पाळेमुळे शोधण्यासाठी ठाणे गुन्हे शाखेने माजी महापौर मीनाक्षी शिंदे यांचे पती राजेंद्र शिंदे (राजा शिंदे) यांची तब्बल 9 तास कसून चौकशी केली. या चौकशीतुन त्यांनी मारेकऱ्यांशी पूर्वपरिचय असल्याची कबुली दिल्याने पूर्णेकर कुटुंबीयांच्या संशयाला व आरोपांना मोठा कायदेशीर आधार मिळाला असून, ठाणे गुन्हे शाखा या दिशेने अधिक पुरावे गोळा करत आहे.
या मॅरेथॉन चौकशीदरम्यान पोलिसांनी अटकेत असलेल्या सर्व मारेकऱ्यांना आणि राजेंद्र शिंदे यांना एकाच खोलीत समोरासमोर (फेस-टू-फेस) बसवून त्यांची कसून उलटतपासणी केली.पोलिसांनी या चौकशीत कॉल रेकॉर्ड्स, गुप्त बैठका आणि आरोपींच्या विधानांच्या आधारे शिंदेंवर प्रश्नांचा भडीमार केला. या समोरासमोर झालेल्या चौकशीत राजेंद्र शिंदे यांनी अटकेत असलेले पाचही आरोपी आपल्या ओळखीचे असल्याची महत्त्वाची कबुली दिली आहे.
मात्र, या हत्येच्या कटाशी किंवा या गुन्ह्याशी आपला कोणताही संबंध नाही, असा दावा त्यांनी तीव्रतेने केला आहे. आपल्या पत्नी नगरसेविका असल्याने प्रभागातील अनेक नागरिक व कार्यकर्ते कामानिमित्त भेटायला येत असतात आणि हे आरोपीदेखील त्याच कामासाठी भेटले होते, असे स्पष्टीकरण राजेंद्र शिंदे यांनी पोलिसांसमोर दिले.
दुसरीकडे, मृत प्रदीप पूर्णेकर यांचे सुपुत्र राम पूर्णेकर यांनी हत्येच्या पहिल्या दिवसापासूनच माजी महापौर मीनाक्षी शिंदे आणि राजेंद्र शिंदे यांच्यावर गंभीर आरोप केले होते. वडिलांच्या हत्येपूर्वी काही दिवस हे आरोपी राजेंद्र शिंदे यांच्या ‘निळकंठ’ इमारतीबाहेर फिरत असल्याचे राम पूर्णेकर यांनी सांगितले होते.
29 सप्टेंबर रोजी रात्री साडेनऊच्या सुमारास मनोरमानगर येथील कार्यालयात बसलेले प्रदीप पूर्णेकर यांच्यावर पाच हल्लेखोरांनी अचानक धाड टाकून गोळीबार केला होता. त्यानंतर धारदार कोयत्याने वार करून त्यांची अत्यंत निर्घृण हत्या करण्यात आली होती. या गंभीर प्रकरणात ठाणे गुन्हे शाखेने धडक कारवाई करत सुभाष उर्फ पप्या शिंदे, संतोष कनोजिया उर्फ टल्ली, अमित जयकिशन सिंग उर्फ पपलू, निखिल यादव आणि नितेश पवार उर्फ भावड्या या पाच मारेकऱ्यांना आधीच बेड्या ठोकल्या आहेत. या प्रकरणातील पोलीस तपास आता आणखी तीव्र झाला असून नवनवीन खुलासे समोर येत आहेत.
