यवत, ता. 16 : कासुर्डी आणि ताम्हणवाडी (ता. दौंड) येथे वीजमीटर बायपास करून वीजचोरी केल्याचे महावितरणच्या तपासणीत उघडकीस आले आहे. या दोन स्वतंत्र प्रकरणांत एकूण 8 हजार 581 युनिट वीजचोरी झाल्याचा आरोप असून, महावितरण कंपनीचे एकूण 82 हजार 760 रुपयांचे आर्थिक नुकसान झाले आहे. याप्रकरणी यवत पोलिस ठाण्यात भारतीय विद्युत कायदा 2003 च्या कलम 135 अन्वये दोघांवर वीजचोरीचा गुन्हा दाखल करण्यात आल्या आहेत.
युवराज सोमेश्वर ठोंबरे व सोमनाथ लक्ष्मण दरेकर अशी गुन्हा दाखल करण्यात आलेल्यांची नावे आहेत. याप्रकरणी महावितरणच्या यवत शाखेतील सहाय्यक अभियंता नितीन मोहन झारगड यांनी याबाबत पोलिसांकडे फिर्याद दिली आहे. वीजग्राहकांच्या मीटरची आणि वीजवापराची तपासणी करण्याचे अधिकार असलेल्या पथकाने दोन्ही ठिकाणी तपासणी केली असता वीजचोरीची प्रकरणे समोर आली.
कासुर्डीतील हॉटेलमध्ये वीजचोरी
कासुर्डी येथे 20 ऑगस्ट 2026 रोजी महावितरणच्या पथकाने प्रकाश बुधाजी ठोंबरे यांच्या वीजजोडणीची तपासणी केली. या वेळी युवराज सोमेश्वर ठोंबरे यांनी वीजमीटर बायपास करून शेजारील लघुदाब वाहिनीवर काळ्या रंगाच्या वायरद्वारे आकडा टाकून हॉटेलमध्ये वीजपुरवठा घेतल्याचे तपासणीत आढळून आला आहे. हॉटेलमध्ये पंखे, टीव्ही, फ्रिज, दिवे आणि मोटार यांसारखी विद्युत उपकरणे वापरली जात होती.
जुलै 2025 ते जुलै 2026 या कालावधीत 5 हजार 428 युनिट वीजचोरी करून महावितरणचे 30 हजार 270 रुपयांचे नुकसान केल्याचा आरोप आहे. या प्रकरणात वीजचोरीशी संबंधित पुरावे जप्त करून त्यावर पंचांच्या सह्या घेण्यात आल्या आहेत.
ताम्हणवाडीतही मीटर बायपास
दुसऱ्या घटनेत 27 जुलै 2026 रोजी ताम्हणवाडी येथे सोमनाथ लक्ष्मण दरेकर यांच्या वीजजोडणीची तपासणी करण्यात आली. या वेळी वीजमीटर बायपास करून दरेकरवाडी गावठाण रोहित्राच्या बॉक्समधून काळ्या रंगाच्या वायरद्वारे घरात वीजपुरवठा घेतल्याचे आढळल्याचे तक्रारीत नमूद आहे. घरामध्ये पंखे, टीव्ही, फ्रिज, दिवे आणि मोटार यांसारखी उपकरणे वापरली जात होती. ऑगस्ट 2025 ते जुलै 2026 या कालावधीत 3 हजार 153 युनिट वीजचोरी करून महावितरणचे 52 हजार 490 रुपयांचे आर्थिक नुकसान केल्याचा आरोप आहे. या ठिकाणीही वीजचोरीशी संबंधित पुरावे जप्त करण्यात आले आहेत.
दौंड तालुक्यातील या दोन घटनांमुळे वीजमीटरमध्ये फेरफार करून किंवा अनधिकृत जोडणीद्वारे वीज वापरण्याचा प्रकार समोर आला आहे. या प्रकरणांचा पुढील तपास यवत पोलिस करीत आहेत.
