उल्हासनगर : ठाणे जिल्ह्यातील गुन्हेगारीच्या घटनांमध्ये आणखी एका हत्येची भर पडली आहे. उल्हासनगर रेल्वे स्थानक परिसरात प्रसिद्ध यूट्यूबर हरेश गजवानी यांची हत्या करण्यात आली. बुधवारी सायंकाळी घडलेल्या या घटनेनंतर पोलिसांनी तपासाला वेग दिला. अवघ्या 24 तासांत 3 संशयितांना ताब्यात घेऊन त्यानंतर अटक करण्यात आल्याची माहिती समोर आली आहे.
या प्रकरणात अविनाश नायडू, विजय पुरणसिंग आणि नूर आलम खान यांच्यावर पोलिसांचा संशय आहे. हरेश यांच्यावर धारदार शस्त्राने वार केल्यानंतर गोळीबार करण्यात आल्याचा प्राथमिक संशय व्यक्त केला जात आहे. मात्र, हत्येचा नेमका घटनाक्रम आणि त्यामागील कारणांचा तपास सुरू आहे.
घटनेची माहिती मिळताच विठ्ठलवाडी पोलिसांनी 3 स्वतंत्र पथके तयार केली. ठाणे गुन्हे शाखेनेही समांतर तपास सुरू केला. पोलिसांच्या या संयुक्त प्रयत्नांतून तिघांना ताब्यात घेण्यात आले. पोलीस उपायुक्त सचिन गोरे यांनी दिलेल्या माहितीनुसार, या हत्येमागे पूर्वीचा वाद असण्याची शक्यता आहे.
हरेश गजवानी हे उल्हासनगरमधील कथित बेकायदेशीर जुगार अड्ड्यांविरोधात पोलिसांकडे वारंवार तक्रारी करत होते. या तक्रारींचा आणि हत्येचा संबंध आहे का, याचा तपास केला जात आहे. यापूर्वीही हरेश आणि संशयित आरोपींविरोधात उल्हासनगरमधील पोलीस ठाण्यात परस्परविरोधी गुन्हे दाखल असल्याची माहिती समोर आली आहे.
पोलिसांनी या प्रकरणातील आरोपींना अटक करून त्यांची चौकशी सुरू केली आहे. हत्येमागील नेमके कारण, पूर्वीच्या वादाचे स्वरूप आणि इतर संभाव्य बाबी तपासानंतर स्पष्ट होतील.
