पुणे : जिल्ह्यातील खडकवासला परिसरातील घेरा सिंहगड आणि खानापूर भागात बिबट्याची दहशत पुन्हा एकदा वाढली आहे. खानापूर-पाबे रस्त्यावरील थोपटेवाडी येथील बापूजीबुवा मंदिराजवळ संध्याकाळी बिबट्याने दुचाकीस्वारांवर तब्बल तीन वेळा हल्ले करण्याचा प्रयत्न केल्याची थरारक घटना समोर आली आहे. या वाढत्या घटनांमुळे स्थानिक नागरिक, शाळकरी मुलांचे पालक आणि प्रवाशांमध्ये तीव्र भीतीचे वातावरण पसरले आहे.संध्याकाळी साडेसहा वाजण्याच्या सुमारास पहिली घटना घडली.
तसेच आंबेगाव बुद्रुक येथील ओम शिंदे आणि तुषार कांबळे हे दोघे दुचाकीवरून खानापूरच्या दिशेने जात होते. रस्त्यावरील एका वळणावर अचानक दबा धरून बसलेल्या बिबट्याने त्यांच्यावर झडप मारली. या धक्क्यातून ते सावरत असतानाच, काही अंतरावर धोंडीराम थोपटे हे आपली 16 वर्षांची मुलगी सलोनी आणि तिची मैत्रीण सोनल यांना घेऊन दुचाकीवरून जात होते. यादरम्यान, बिबट्याने पुन्हा एकदा चालत्या गाडीवर झडप घातली. या हल्ल्यात बिबट्याचा पंजा लागून सलोनी जखमी झाली.
मात्र, मुलींनी हिंमत दाखवून मोठा आवाज केल्यामुळे बिबट्याने घाबरून जंगलाच्या दिशेने पळ काढला. जखमी मुलीला तातडीने खानापूर प्राथमिक आरोग्य केंद्रात आणि नंतर पुढील उपचारासाठी पुण्यातील ससून रुग्णालयात दाखल करण्यात आले आहे.या परिसरामध्ये गेल्या काही वर्षांपासून बिबट्याचा वावर आहे. मात्र, एकाच दिवशी एकाच भागात वारंवार हल्ले होण्याचा प्रयत्न झाल्याने ग्रामस्थांमध्ये संताप आणि चिंतेचे वातावरण आहे. खानापूरचे माजी उपसरपंच नंदकुमार जावळकर यांनी वनविभागाने या प्रकरणी तातडीने पावले उचलत परिसरात गस्त वाढवावी आणि नागरिकांच्या सुरक्षेसाठी योग्य उपाययोजना कराव्यात, अशी मागणी केली आहे.
घटनेची माहिती मिळताच वनपरिमंडळ अधिकारी वैशाली हाडवळे यांनी घटनास्थळी भेट देऊन पाहणी केली आणि बिबट्याचा माग घेण्याचा प्रयत्न केला. वनविभागातर्फे नागरिकांमध्ये जनजागृती मोहीम राबवली जात असून, विशेषतः वनक्षेत्राजवळ किंवा दाट झाडी असलेल्या भागात राहणाऱ्या नागरिकांनी व प्रवाशांनी रात्रीच्या वेळी एकट्याने घराबाहेर पडू नये, असे आवाहन प्रशासनाकडून करण्यात आले आहे.
