आळंदी : रायगडमधील प्रसिद्ध दिवेआगर समुद्रकिनारी सहलीसाठी गेलेल्या आळंदीतील 11वी आणि 12वी विज्ञान शाखेच्या विद्यार्थ्यांवर काळाने घाला घातला. विनर्स अकॅडमीच्या 8 विद्यार्थ्यांचा समुद्रात बुडून दुर्दैवी मृत्यू झाला. या घटनेने आळंदी शहरासह दिवेआगर परिसरातही हळहळ व्यक्त होत आहे.
या दुर्घटनेनंतर आळंदी नगरपरिषद प्रशासनाने शहरातील कोचिंग क्लासेस आणि विविध आस्थापनांची तपासणी सुरू केली आहे. याच मोहिमेदरम्यान विनर्स अकॅडमीचा कारभार आवश्यक परवानग्यांशिवाय सुरू असल्याचे आढळून आल्याने नगरपरिषदेने संबंधित इमारतीवर कारवाई केली.
नगरपरिषदेच्या विशेष पथकाने श्री. नारायण हरिभाऊ दस यांच्या मालकीच्या मालमत्तेची पाहणी केली. या ठिकाणी विनर्स अकॅडमीच्या माध्यमातून विद्यार्थ्यांना प्रशिक्षण दिले जात असल्याचे आढळले. त्यानंतर नगरपरिषदेच्या नोंदी तपासण्यात आल्या. त्यामध्ये अकॅडमीकडे व्यवसाय परवाना किंवा आवश्यक ना-हरकत प्रमाणपत्र (NOC) नसल्याचे समोर आले.
प्रशासनाच्या म्हणण्यानुसार, आवश्यक कायदेशीर प्रक्रिया पूर्ण न करता क्लासचा व्यवसाय सुरू होता. त्यामुळे नगरपरिषदेने तत्काळ कारवाई करण्याचा निर्णय घेतला. मुख्याधिकारी माधव खांडेकर यांच्या निर्देशानंतर कर विभाग प्रमुख सीमा चारवे यांच्या नेतृत्वाखाली विशेष पथक घटनास्थळी पोहोचले.
पोलीस बंदोबस्तात विनर्स अकॅडमीच्या इमारतीला सील करण्यात आले. या कारवाईनंतर आळंदी शहरातील इतर कोचिंग क्लासेस आणि आस्थापनांचीही तपासणी करण्यास सुरुवात करण्यात आली आहे.
दरम्यान, शहरातील सर्व शिक्षण संस्था आणि खासगी क्लासेसनी आवश्यक परवाने घेऊनच व्यवसाय करावा, असे आवाहन नगरपरिषदेने केले आहे. नियमांचे उल्लंघन आढळल्यास संबंधितांवर कायदेशीर कारवाई केली जाईल, असा इशाराही प्रशासनाकडून देण्यात आला आहे.
दिवेआगर दुर्घटनेनंतर प्रशासनाच्या या कारवाईकडे गांभीर्याने पाहिले जात असून, शहरातील इतर क्लासेसच्या परवानग्यांचीही तपासणी होणार असल्याचे सांगण्यात आले आहे.
