मुंबई : मराठा आरक्षण आंदोलनातील प्रमुख कार्यकर्ते मनोज जरांगे पाटील यांच्या 11 समर्थकांविरोधात जालना जिल्ह्यातील अंबड पोलीस ठाण्यात गुन्हा नोंदवण्यात आला आहे. सोशल मीडियाचा गैरवापर करून एका महिला कार्यकर्त्याला धमक्या देणे, अश्लील शिवीगाळ करणे आणि बदनामीकारक मजकूर प्रसारित केल्याचा आरोप या समर्थकांवर ठेवण्यात आला आहे.
आंदोलनातील सक्रिय महिला कार्यकर्त्या ललिता तारक यांच्या तक्रारीवरून पोलिसांनी ही कारवाई केली आहे. तारक यांनी दिलेल्या माहितीनुसार, काही व्यक्तींनी त्यांच्याविरोधात आक्षेपार्ह मजकूर पोस्ट केला. तसेच, कृत्रिम बुद्धिमत्तेचा वापर करून त्यांचे बनावट अश्लील फोटो आणि व्हिडिओ तयार करून ते इंटरनेटवर पसरवले. याप्रकरणी त्यांनी पोलीस ठाण्यात पुरावे म्हणून सोशल मीडियाचे स्क्रीनशॉट आणि फोन कॉलचे रेकॉर्ड सादर केले आहेत. या तक्रारीनंतर पोलिसांनी 5 नामांकित आणि इतर अज्ञात अशा एकूण 10 ते 11 जणांवर गुन्हा दाखल करून तपास सुरू केला आहे.
या घटनेवर प्रतिक्रिया देताना मनोज जरांगे पाटील यांनी अधिक भाष्य करणे टाळले. तारक यांना त्रास झाल्यामुळे त्यांनी पोलिसांत अर्ज दिला असून, त्यावर मी काही बोलणार नाही, असे त्यांनी स्पष्ट केले. तसेच, आपल्या सहकाऱ्यांना ईडी किंवा सीबीआयच्या नोटिसा आल्याच्या चर्चांवर बोलताना, आंदोलन दडपण्यासाठी सरकारकडून दबाव आणला जात असल्याचा आरोप जरांगे यांनी केला.
याशिवाय, लोकशाहीचा संकोच होत असल्यास मुख्य निवडणूक आयुक्त ज्ञानेश कुमार यांच्यासारख्या अधिकाऱ्यांना पदावर का ठेवले जाते, असा सवालही जरांगे यांनी उपस्थित केला. या सर्व घडामोडींमुळे आणि महिला आंदोलकाच्या तक्रारीनंतर मराठा आरक्षण आंदोलनातील अंतर्गत मतभेद पुन्हा एकदा चव्हाट्यावर आले आहेत.
