पुणे : पुणे जिल्हा आणि महाराष्ट्र राज्यातील शासकीय कार्यालये तसेच शाळांच्या सुट्ट्यांबाबत शिक्षण विभाग आणि विभागीय आयुक्तांकडून महत्त्वाची माहिती समोर आली आहे. पुणे जिल्ह्यातील शासकीय व निमशासकीय कार्यालयांच्या दिवाळी सुट्ट्यांच्या वेळापत्रकात बदल करण्यात आला असून, राज्यभरातील शाळांच्या आगामी शैक्षणिक वर्षातील सुट्ट्यांचे नियोजनही स्पष्ट झाले आहे.
विभागीय आयुक्त शीतल तेली-उगले यांनी दिलेल्या माहितीनुसार, पुणे जिल्ह्यात दिवाळीनिमित्त दिल्या जाणाऱ्या स्थानिक सुट्टीच्या तारखेत सुधारणा करण्यात आली आहे. यापूर्वी धनत्रयोदशीच्या पार्श्वभूमीवर 6 नोव्हेंबर रोजी स्थानिक सुट्टी निश्चित करण्यात आली होती. मात्र, आता त्यात बदल करून 9 नोव्हेंबर 2026 रोजी स्थानिक सुट्टी देण्याचे आदेश काढण्यात आले आहेत. सामान्य प्रशासन विभागाच्या 14 मार्च 1983 च्या अधिसुचनेनुसार मिळालेल्या अधिकारांचा वापर करून हा नवीन निर्णय घेण्यात आला आहे.
ही सुट्टी केवळ पुणे जिल्ह्यातील सरकारी आणि निमसरकारी संस्थांसाठीच मर्यादित असून, संपूर्ण राज्यासाठी लागू असणारी ही सार्वजनिक सुट्टी नाही, याची नोंद सर्व कार्यालयांनी घेणे आवश्यक आहे.दुसऱ्या बाजूला, शालेय शिक्षण विभागाने शैक्षणिक वर्ष 2026-27 साठी प्राथमिक, माध्यमिक आणि उच्च माध्यमिक शाळांच्या सत्रांचे व सुट्ट्यांचे वेळापत्रक परिपत्रकाद्वारे जाहीर केले आहे. यामध्ये विद्यार्थ्यांना दिवाळीच्या सुट्टीसोबतच उन्हाळ्याची मोठी सुट्टी मिळणार आहे.
नवीन वेळापत्रकानुसार राज्यातील सर्व शाळांना 3 मे ते 14 जून 2027 या काळात उन्हाळी सुट्टी असेल. सुमारे 43 दिवसांची ही दीर्घ सुट्टी असल्याने विद्यार्थ्यांना शैक्षणिक वर्ष संपल्यानंतर सुट्ट्यांचा पुरेपूर आनंद घेता येणार आहे
