Pune Crime : यवत : पुणे जिल्ह्यातील यवत परिसरात घरफोडी आणि चोरीच्या घटनांमध्ये वाढ होत असताना पोलिसांनी मोठी कारवाई करत एक अट्टल टोळी पकडली आहे. या कारवाईत तीन संशयित आरोपींना ताब्यात घेण्यात आले असून सुमारे 2 लाख रुपयांचा मुद्देमाल जप्त करण्यात आला आहे. या घटनेमुळे परिसरात काहीसा दिलासा मिळाला आहे.
मिळालेल्या माहितीनुसार, जानेवारी महिन्यात वाखारी गावात पहाटेच्या वेळी एका घरात अज्ञात चोरट्यांनी घुसून सोन्याचे दागिने आणि रोख रक्कम असा सुमारे 1 लाख 98 हजार 671 रुपयांचा ऐवज चोरी केला होता. तसेच दुसऱ्या एका घरात चोरीचा प्रयत्नही करण्यात आला होता. या प्रकरणी यवत पोलीस ठाण्यात गुन्हा दाखल करण्यात आला होता.
तपासादरम्यान पोलिसांनी परिसरातील सीसीटीव्ही फुटेजची पाहणी केली आणि गुप्त माहितीच्या आधारे संशयितांचा शोध सुरू केला. मिळालेल्या माहितीच्या आधारे पोलिसांनी सापळा रचून तीन आरोपींना ताब्यात घेतले. चौकशीत त्यांनी यवत आणि उरळी कांचन परिसरात अनेक ठिकाणी घरफोडी केल्याची कबुली दिली आहे.
पोलिसांच्या तपासात या आरोपींनी एकूण 10 गुन्ह्यांची कबुली दिली असून चोरीचा माल त्यांनी एका सराफाला विकल्याचेही समोर आले आहे. संबंधित सराफालाही या प्रकरणात अटक करण्यात आली आहे.
मुख्य आरोपी हा सराईत गुन्हेगार असून त्याच्यावर विविध पोलीस ठाण्यांत अनेक गुन्हे दाखल आहेत. या कारवाईमुळे परिसरातील चोरीच्या घटनांवर काही प्रमाणात आळा बसण्याची शक्यता व्यक्त केली जात आहे. पुढील तपास पोलीस करत आहेत.
