ठाणे : ठाण्यात २९ तारखेच्या रात्री उद्धव बाळासाहेब ठाकरे शिवसेना पक्षाच्या विभागप्रमुख प्रदीप पूर्णेकर यांची हत्या झाल्यानंतर या प्रकरणाच्या तपासाला आता वेगळे वळण मिळाले आहे. मनोरमानगर परिसरातील क्लस्टर प्रकल्पाच्या पार्श्वभूमीवर पूर्णेकर यांनी एका प्रसिद्ध बांधकाम कंपनीविरोधात माहितीच्या अधिकारात माहिती मागवली होती. या कारणावरून त्यांना धमक्या येत असल्याचा दावा त्यांच्या कुटुंबीयांकडून करण्यात आला होता. आता या प्रकरणात ठाणे गुन्हे शाखेच्या युनिट क्रमांक ५ ने दोन बांधकाम व्यावसायिकांची चौकशी केल्याची माहिती समोर आली आहे.
पूर्णेकर राहत असलेल्या मनोरमानगर, शास्त्रीनगर, गणेशनगर आणि चर्च रोड परिसरात मोठ्या प्रमाणावर क्लस्टर योजनेअंतर्गत बांधकाम प्रकल्प प्रस्तावित असल्याचे सांगितले जात आहे. सुमारे १५० एकर परिसरात तब्बल ११ हजार कोटी रुपयांचा हा प्रकल्प असल्याचा दावा करण्यात आला आहे. या परिसरातील काही अनधिकृत बांधकामांविरोधात पूर्णेकर यांनी आवाज उठवला होता. तसेच क्लस्टर प्रकल्प विशिष्ट बांधकाम कंपनीला मिळावा यासाठी प्रयत्न होत असल्याची चर्चा असल्याने त्यासंदर्भातील माहितीही त्यांनी माहितीच्या अधिकारातून मागवली होती.
या पार्श्वभूमीवर पूर्णेकर यांना अनेकदा धमक्या आल्याचा आरोप त्यांच्या कुटुंबीयांनी केला होता. आता त्यांच्या हत्येचा आणि या क्लस्टर प्रकल्पाचा काही संबंध आहे का, या दिशेने तपास यंत्रणा चौकशी करत असल्याचे सांगितले जात आहे. ठाणे गुन्हे शाखेच्या युनिट ५ ने एका मोठ्या बिल्डरला आणि एका बांधकाम कंपनीच्या भागीदाराला चौकशीसाठी बोलावले होते. दोघांची बराच वेळ चौकशी करण्यात आली असून, त्यांना सोडण्यात आले आहे. तसेच पुढील चौकशीसाठी पुन्हा हजर राहण्यास सांगण्यात आल्याची माहिती आहे.
दरम्यान, या हत्येप्रकरणी राजकीय आरोप-प्रत्यारोपही सुरू आहेत. उद्धव बाळासाहेब ठाकरे शिवसेनेच्या नेत्या सुषमा अंधारे यांनी पूर्णेकर यांच्या हत्येमागे मोठी सुपारी देण्यात आल्याचा आरोप केला आहे. मात्र या आरोपांची स्वतंत्र पुष्टी झालेली नाही. तसेच क्लस्टर प्रकल्पाशी संबंधित बांधकाम व्यावसायिकांचा हत्येशी प्रत्यक्ष संबंध असल्याचेही अद्याप तपासातून स्पष्ट झालेले नाही. त्यामुळे या प्रकरणातील पुढील चौकशीत नेमकी कोणती माहिती समोर येते, याकडे लक्ष लागले आहे.
