पुणे : म्हाडाच्या पुणे गृहनिर्माण व क्षेत्रविकास मंडळाच्या वतीने पुणे आणि पिंपरी-चिंचवडमधील ४,४६२ सदनिकांच्या विक्रीसाठी संगणकीय सोडत आयोजित करण्यात आली आहे. या सोडतीसाठी ऑनलाइन अर्ज सादर करण्याची मुदत आता २२ ऑक्टोबर २०२६ रोजी रात्री ११ वाजून ५९ मिनिटांपर्यंत वाढवण्यात आली आहे. प्रमाणपत्रांच्या ऑनलाइन पडताळणीत येणाऱ्या अडचणी आणि अर्जदारांच्या विनंतीचा विचार करून मंडळाने हा निर्णय घेतला आहे.
या सोडतीसाठी आतापर्यंत १ लाख ६७ हजार ५७० अर्ज प्राप्त झाले आहेत. त्यापैकी १ लाख ४ हजार ८६ अर्ज अनामत रकमेसह दाखल झाले आहेत. ऑनलाइन अर्ज नोंदणी आणि अर्ज भरण्याची प्रक्रिया २४ ऑगस्ट २०२६ रोजी दुपारी १२ वाजता सुरू झाली होती.
१५ टक्के सामाजिक गृहनिर्माण योजनेअंतर्गत अत्यल्प आणि अल्प उत्पन्न गटातील नागरिकांसाठी मांजरी खुर्द, म्हाळुंगे आणि भूगाव येथे सदनिका उपलब्ध आहेत.
२० टक्के सर्वसमावेशक गृहनिर्माण योजनेअंतर्गत पुणे शहरातील धानोरी, वारजे, कात्रज, हडपसर, पाषाण, खराडी, बाणेर, धायरी, लोहगाव, बिबवेवाडी, मुंढवा, उंड्री, वडगाव, बावधन आणि कोंढवा खुर्द या भागांतील घरांचा समावेश आहे.
पिंपरी-चिंचवड परिसरात मोशी, किवळे, डुडुळगाव, ताथवडे, वाकड, चिखली, रावेत, पुनावळे, बालेवाडी, रहाटणी, वडमुखवाडी, मानुर्डी, पिंपळे सौदागर आणि पिंपळे गुरव येथे सदनिका उपलब्ध आहेत.
अर्जदारांनी IHLMS 2.0 प्रणालीवर अपलोड केलेल्या अधिवास प्रमाणपत्राची आणि उत्पन्नाच्या दाखल्याची पडताळणी MahaIT मार्फत केली जाते. तसेच आयकर विवरणपत्राची पडताळणी आयकर विभागाकडून ऑनलाइन केली जाते. या प्रक्रियेला वेळ लागत असल्याने यापूर्वी अर्जाची मुदत १५ ऑक्टोबरपर्यंत वाढवण्यात आली होती.
मात्र, अधिवास प्रमाणपत्र आणि उत्पन्नाच्या दाखल्यांची पडताळणी करताना अडचणी येत असल्याने काही अर्ज अद्याप प्रलंबित आहेत. सध्या ३,८७२ अधिवास प्रमाणपत्रे आणि ९,१४२ उत्पन्नाचे दाखले पडताळणीच्या प्रतीक्षेत आहेत. त्यामुळे अर्जदारांना आणखी वेळ मिळावा, यासाठी २२ ऑक्टोबरपर्यंत मुदतवाढ देण्यात आली आहे.
