आदित्य बोराटे
इंदापूर: पावसाने ओढ दिल्याने इंदापूर तालुक्यातील शेतकरी अडचणीत सापडला असून, शेतीच्या नुकसानीने त्यांच्यासमोरील संकट अधिक गडद झाले आहे. या पार्श्वभूमीवर सरकारने पंचनाम्यांच्या प्रक्रियेत वेळ न दवडता शेतकऱ्यांना सरसकट आर्थिक मदत द्यावी, तसेच कर्जमाफी करावी, अशी मागणी बारामती लोकसभा मतदारसंघाच्या खासदार सुप्रिया सुळे यांनी शुक्रवारी (दि. ३) केली.
सुळे यांनी रेडणी व निरवांगी येथे भेट देऊन दुष्काळी परिस्थितीची पाहणी केली. यावेळी त्यांनी शेतकऱ्यांशी थेट संवाद साधत त्यांच्या अडचणी जाणून घेतल्या. यंदा तालुक्यात एल निनोच्या प्रभावामुळे सरासरीच्या तुलनेत पावसाचे प्रमाण कमी राहिल्याने अनेक भागांतील शेतीचे मोठ्या प्रमाणावर नुकसान झाले आहे. त्यामुळे संकटात सापडलेल्या शेतकऱ्यांना तातडीने दिलासा देण्याची गरज असल्याचे सुळे यांनी सांगितले.
दरम्यान, तालुक्यातील अनेक गावांमध्ये पिण्याच्या पाण्याचा प्रश्नही गंभीर होण्याची शक्यता आहे. त्यामुळे गरज असलेल्या गावांमध्ये तातडीने टँकरद्वारे पाणीपुरवठा सुरू करावा. जनावरांसाठी आवश्यक त्या ठिकाणी चारा छावण्या सुरू कराव्यात आणि त्यांच्या पिण्याच्या पाण्याचीही व्यवस्था करावी, अशी मागणी त्यांनी केली.
शेतकऱ्यांसाठी राजकारण बाजूला ठेवू
शेतकऱ्यांच्या प्रश्नावर राजकारण बाजूला ठेवून सहकार्य करण्याची आमची तयारी आहे. सरकारने तातडीने बैठक घेऊन दुष्काळी परिस्थितीचा सामना करण्यासाठी पुढील वर्षभराचे नियोजन करावे, असे आवाहन सुळे यांनी केले.
यावेळी राष्ट्रवादी काँग्रेस पार्टी शरदचंद्र पवार पक्षाचे इंदापूर तालुकाध्यक्ष तेजसिंह पाटील, कार्याध्यक्ष महारुद्र पाटील, अमोल भिसे, सागर मिसाळ, अशोक घोगरे, छायाताई पडसळकर यांच्यासह रेडणी व निमसाखर गावचे सरपंच, उपसरपंच, सदस्य, प्रशासकीय अधिकारी आणि शेतकरी उपस्थित होते.
