पुणे: पुणे जिल्हा परिषदेचा सन 2026-27 या आर्थिक वर्षाचा (Pune ZP Budget) अर्थसंकल्प मुख्य कार्यकारी अधिकारी तथा प्रशासक गजानन पाटील यांच्या हस्ते सादर करण्यात आला असून यंदाचा एकूण आकार 301 कोटी रुपये इतका आहे. मागील वर्षाच्या तुलनेत सुमारे 9 कोटी रुपयांची वाढ करण्यात आली आहे. ग्रामीण भागातील मूलभूत गरजा आणि बदलत्या काळातील कौशल्यांची गरज लक्षात घेऊन शिक्षण, आरोग्य आणि कौशल्य विकास या क्षेत्रांना केंद्रस्थानी ठेवण्यात आले आहे. (Latest Marathi News)
या अर्थसंकल्पात शिक्षण क्षेत्रात महत्त्वाचे बदल सुचवले गेले आहेत. पहिली ते आठवीपर्यंतच्या विद्यार्थ्यांसाठी ‘कौशल्य सेतू’ कार्यक्रमाच्या माध्यमातून कृत्रिम बुद्धिमत्ता म्हणजेच एआयचे प्राथमिक ज्ञान देण्याचा प्रयत्न केला जाणार आहे. ग्रामीण भागातील विद्यार्थ्यांना आधुनिक तंत्रज्ञानाशी जोडण्यामागे भविष्यातील स्पर्धात्मक जगासाठी त्यांना तयार करणे हा उद्देश आहे. यासोबतच विद्यार्थ्यांच्या मानसिक आरोग्यावरही भर देत ध्यान आणि योगसाधना कार्यक्रम राबवण्याची योजना आहे.
माजी उपमुख्यमंत्री अजित पवार यांच्या सूचनेनुसार दोन सायन्स पार्क आणि स्किल सेंटर उभारण्याचा निर्णय घेण्यात आला आहे. यामुळे ग्रामीण भागातील विद्यार्थ्यांना प्रत्यक्ष अनुभवातून विज्ञान आणि तंत्रज्ञान शिकण्याची संधी मिळणार आहे. विशेष म्हणजे निवडक विद्यार्थ्यांना इस्रो, नासा आणि युरोपियन स्पेस सेंटर येथे शैक्षणिक सहलीसाठी पाठवण्याचा उपक्रमही हाती घेण्यात येणार आहे, ज्यामुळे त्यांच्या दृष्टीकोनात मोठा बदल होऊ शकतो.
महिला आणि सामाजिक सक्षमीकरणासाठी ‘दिव्यांग स्वावलंबन’, ‘माझे अस्तित्व’, ‘फिरते शॉपी’ आणि ‘सावित्री कॅफे’ अशा योजना सुरू करण्यात येणार आहेत. तसेच ‘ग्लोबल गुरुजी’ उपक्रमांतर्गत 50 शिक्षकांना फिनलंड आणि सिंगापूरसारख्या देशांतील शिक्षण पद्धतीचा अनुभव घेण्याची संधी दिली जाणार आहे.
पर्यावरणपूरक उपक्रमांत ‘गावचा सूर्य, गावची वीज’ या संकल्पनेतून सोलर पार्क उभारण्याचा प्रस्ताव आहे. एकूणच, हा अर्थसंकल्प केवळ खर्चाचा आराखडा नसून ग्रामीण भागात शिक्षण, तंत्रज्ञान, रोजगार आणि पर्यावरण यांचा समतोल साधण्याचा प्रयत्न म्हणून पाहिला जात आहे.
