Mumbai news : मुंबई : मुलुंड रेल्वे स्थानकावर वैवाहिक वादातून एक धक्कादायक घटना घडली आहे. पतीने पत्नीला धावत्या लोकलसमोर ढकलल्याने तिचा मृत्यू झाला. या प्रकरणी पोलिसांनी आरोपी पतीला सूरत येथून अटक केली असून पुढील तपास सुरू आहे.
पोलिसांनी दिलेल्या माहितीनुसार, मृत महिला आणि तिच्या पतीमध्ये काही दिवसांपासून वाद सुरू होते. या वादामुळे महिलेने यापूर्वी पोलिसांकडे तक्रारही दिली होती. तिचा भाऊ, जो सैन्यात कार्यरत आहे, तो तिला आणि तिच्या मुलाला मूळ गावी घेऊन जाण्यासाठी मुंबईत आला होता. 14 मार्च रोजी ते प्रवासाची तयारी करत असताना पुन्हा एकदा पती-पत्नीमध्ये वाद झाला.
यानंतर संबंधित महिला, तिचा भाऊ आणि मुलगा मुलुंड स्थानकावर पोहोचले. दरम्यान, काही कारणाने भाऊ पुन्हा घरी गेला असताना आरोपी पतीही तेथे पोहोचला. पुढे तो स्थानकावर आला आणि पत्नीशी बोलण्याचा प्रयत्न केला. मात्र, वाद वाढल्याने परिस्थिती चिघळली.
प्लॅटफॉर्म क्रमांक 1 वर उभ्या असलेल्या पत्नीला आरोपीने अचानक समोरून येणाऱ्या लोकलसमोर ढकलल्याची माहिती समोर आली आहे. या घटनेनंतर स्थानकावरील प्रवाशांनी तातडीने रेल्वे प्रशासनाला कळवले. जखमी अवस्थेत महिलेला रुग्णालयात दाखल करण्यात आले, मात्र उपचारादरम्यान तिचा मृत्यू झाला.
घटनेनंतर आरोपी पती मुलासह फरार झाला होता. पोलिसांनी शोधमोहीम राबवून त्याला सूरत येथून अटक केली. या प्रकरणी गुन्हा दाखल करण्यात आला असून अधिक तपास सुरू आहे. या घटनेमुळे परिसरात खळबळ उडाली आहे.
