पिंपरी-चिंचवड: पिंपरी-चिंचवड परिसरात एका 25 वर्षीय विवाहित (Pimpri-Chinchwad News) महिलेच्या आत्महत्येच्या घटनेने पुन्हा एकदा मानसिक तणाव आणि कौटुंबिक संवादाच्या अभावाचा प्रश्न समोर आला आहे. काही दिवसांपूर्वीच पुण्यातील वैष्णवी लाटे प्रकरण ताजे असतानाच आता वैष्णवी सावन दहिवाल या तरुणीने राहत्या घरात गळफास घेत आत्महत्या केल्याची घटना उघडकीस आली आहे. (Pune News)
मिळालेल्या माहितीनुसार, वैष्णवी यांचे तीन वर्षांपूर्वी लग्न झाले होते आणि त्यांना सुमारे दीड वर्षांची मुलगी आहे. त्या पिंपरी-चिंचवडमध्ये कुटुंबासोबत राहत होत्या. काही दिवसांपूर्वी त्यांचा मोबाईल फोन खराब झाला होता. त्यानंतर त्यांनी नवीन मोबाईलसाठी कुटुंबीयांकडे मागणी केली होती. मात्र ही मागणी पूर्ण न झाल्याने त्या मानसिकदृष्ट्या अस्वस्थ असल्याचे सांगितले जात आहे.
सोमवारी त्या बराच वेळ खोलीतून बाहेर न आल्याने कुटुंबीयांनी दरवाजा उघडून पाहिले असता त्या गळफास घेतलेल्या अवस्थेत आढळून आल्या. या घटनेची माहिती मिळताच पोलिसांनी घटनास्थळी धाव घेत पंचनामा केला असून पुढील तपास सुरू आहे.
