शिक्रापूर, (पुणे) : शिरूर तालुक्यातील मौजे वरूडे (रानमळा) येथे दोन दिवसांपूर्वी ओट्यावर झोपलेल्या एका 43 वर्षीय व्यक्तीचा गळा चिरून करण्यात आलेल्या निर्घृण खुनाचा उलगडा करण्यात शिक्रापूर पोलिसांना यश आले आहे. जुन्या भांडणाच्या आणि शिवीगाळीच्या रागातून गावातीलच एका अल्पवयीन मुलाने हा आखून केल्याची कबुली पोलिसांना दिली.
शिक्रापूर पोलीस आणि स्थानिक गुन्हे अन्वेषण शाखेने (LCB) समांतर तपास करीत अवघ्या 48 तासांत गुन्हा उघडकीस आणला आहे. याप्रकरणातील आरोपी अल्पवयीन बालकास पोलिसांनी अटक केली आहे.
शिक्रापूर पोलीस ठाण्याचे वरिष्ठ पोलीस निरीक्षक चंद्रशेखर यादव यांनी दिलेल्या माहितीनुसार, बाळासो बबन तांबे (वय-43, रा. रानमळा, वरूडे, ता. शिरूर) हे सोमवारी (ता. 08) रात्री सव्वा एक वाजण्याच्या सुमारास घरात उकाडा होत असल्यामुळे घराबाहेर असलेल्या ओट्यावर झोपण्यासाठी गेले होते. ते गाढ झोपेत असताना, रात्रीच्या अंधाराचा फायदा घेऊन अज्ञात मारेकऱ्याने त्यांच्या गळ्यावर धारदार हत्याराने प्रहार करून त्यांचा निर्घृण खून केला होता.
View this post on Instagram
या घटनेने शिरूर तालुक्यात मोठी दहशत निर्माण झाली होती. मयताचे भाऊ प्रकाश बबन तांबे यांनी दिलेल्या तक्रारीवरून शिक्रापूर पोलीस ठाण्यात अज्ञात आरोपीविरुद्ध खुनाचा गुन्हा दाखल करण्यात आला होता. गुन्ह्याचे गांभीर्य ओळखून पुणे ग्रामीणच्या वरिष्ठ अधिकाऱ्यांनी शिक्रापूर पोलीस आणि स्थानिक गुन्हे शाखेला (LCB) समांतर तपासाचे आदेश दिले.
पोलिसांनी मयताच्या भूतकाळातील वादांचा आणि शत्रुत्वाची सखोल माहिती घेण्यास सुरुवात केली. संशयाची सुई वरूडे गावातीलच एका अल्पवयीन बालकाकडे वळली. पोलिसांनी तात्काळ त्या अल्पवयीन मुलाला त्याच्या पालकांसमक्ष ताब्यात घेऊन चौकशी केली असता, त्याने गुन्ह्याची दिलेली कबुली ऐकून पोलीसही चक्रावून गेले.
मयत बाळासो तांबे आणि या अल्पवयीन मुलामध्ये दोन वर्षांपूर्वी कडाक्याचे भांडण झाले होते. हा जुना राग मनात असतानाच, 8 दिवसांपूर्वी मयत बाळासो तांबे यांनी या मुलाला पुन्हा रस्त्यात गाठून शिवीगाळ केली आणि मारहाण करण्याची धमकी दिली होती. याच अपमानाचा आणि रागाचा बदला घेण्यासाठी या अल्पवयीन मुलाने 8 जूनच्या रात्री बाळासो ओट्यावर झोपल्याची संधी साधून त्याने धारदार लोखंडी कोयत्याने थेट त्यांच्या गळ्यावर वार करून त्यांचा गेम वाजवला.
शिक्रापूर पोलिसांनी सदर अल्पवयीन बालकाला पुढील कायदेशीर कार्यवाहीसाठी ताब्यात घेतले असून, त्याच्याकडून खून करण्यासाठी वापरलेला १ लोखंडी कोयता जप्त करण्यात आला आहे. या गुन्ह्याचा पुढील पोलीस हवालदार सोमनाथ कचरे आणि पोलीस कॉन्स्टेबल सुजित जगताप करत आहेत. अवघ्या ४८ तासांत खुनाचा छडा लावणाऱ्या पोलीस पथकाचे सर्वत्र कौतुक होत आहे.
सदरची कामगिरी वरिष्ठांच्या मार्गदर्शनाखाली शिक्रापूर पोलीस ठाण्याचे वरिष्ठ पोलीस निरीक्षक चंद्रशेखर यादव, स्थानिक गुन्हे शाखेचे वरिष्ठ पोलीस निरीक्षक प्रमोद क्षिरसागर, पोलीस उपनिरीक्षक महेश डोंगरे यांचेसह श्रेणी पोलीस उपनिरीक्षक जितेंद्र पानसरे, स्थानिक गुन्हे शाखेचे जनार्धन शेळके, राजु मोमीन, तुषार पंदारे, संजु जाधव, सागर धुमाळ, शिकापुर पोलीस ठाण्यातील पोलीस हवालदार विकास पाटील, रोहीदास पारखे, शिवाजी चितारे, श्रीमंत होनमाने, अमोल दांडगे, अमोल नलगे, प्रतिक जगताप, नारायण वाळके, राम जाधव, मच्छिंद्र निचीत यांचे पथकाने केली आहे.
