छत्रपती संभाजीनगर: स्पा आणि सलून सेंटरवर कायदेशीर कारवाई न करण्यासाठी १ लाख ३० हजार रुपयांची लाच मागून तडजोडीनंतर ८० हजार रुपये स्वीकारताना गुन्हे शाखेतील हेड कॉन्स्टेबल दादासाहेब बाबासाहेब झारगड यांना लाचलुचपत प्रतिबंधक विभागाने रंगेहात पकडले. छत्रपती संभाजीनगरमधील दूध डेअरी चौकात गुरुवारी (४ सप्टेंबर) ही कारवाई करण्यात आली. या प्रकरणी झारगड यांच्याविरुद्ध क्रांती चौक पोलिस ठाण्यात गुन्हा दाखल करण्याची प्रक्रिया सुरू असून, त्यांच्या निवासस्थानी एसीबीकडून झडती घेण्यात येत आहे.
तक्रारदार आणि त्यांच्या महिला सहकारी छत्रपती संभाजीनगर शहरात स्पा आणि सलून सेंटर चालवतात. हे सेंटर कोणत्याही अडथळ्याशिवाय सुरू ठेवण्यासाठी तसेच त्यावर कायदेशीर कारवाई न करण्यासाठी गुन्हे शाखेतील हेड कॉन्स्टेबल दादासाहेब झारगड यांनी तक्रारदाराकडे १ लाख ३० हजार रुपयांची लाच मागितल्याचा आरोप आहे.
लाच देण्याची इच्छा नसल्याने तक्रारदाराने २९ ऑगस्ट रोजी एसीबीच्या छत्रपती संभाजीनगर कार्यालयात तक्रार दाखल केली. तक्रार मिळाल्यानंतर एसीबीच्या पथकाने पंचांसमक्ष लाच मागणीची पडताळणी केली. त्यावेळी झारगड यांनी स्पा आणि सलून सेंटरवर कारवाई न करण्यासाठी १ लाख ३० हजार रुपयांची मागणी केल्याचे निष्पन्न झाले. त्यानंतर तडजोडीअंती ८० हजार रुपये स्वीकारण्याचे त्यांनी मान्य केले.
लाच मागितल्याचे स्पष्ट झाल्यानंतर एसीबीने गुरुवारी सापळा रचला. झारगड यांनी तक्रारदाराला फोन करून लाचेची रक्कम घेऊन दूध डेअरी चौकात येण्यास सांगितले. ठरल्याप्रमाणे तक्रारदार तेथे पोहोचल्यानंतर पंचांसमक्ष ८० हजार रुपयांची रक्कम झारगड यांनी स्वीकारली. त्याचवेळी दबा धरून बसलेल्या एसीबीच्या पथकाने त्यांना रंगेहात ताब्यात घेतले.
या प्रकरणी दादासाहेब झारगड यांच्याविरुद्ध भ्रष्टाचार प्रतिबंधक कायदा १९८८ मधील कलम ७ अंतर्गत गुन्हा दाखल करण्याची प्रक्रिया सुरू आहे. तसेच त्यांच्या निवासस्थानी एसीबीकडून झडती घेण्यात येत असून, त्यांच्या मालमत्तेबाबतही तपास केला जात आहे. या कारवाईमुळे पोलीस दलात खळबळ उडाली आहे.
