पुणे: शिरूरमध्ये स्कॉर्पिओ जीप एसटी बसला आडवी लावून चालक आणि वाहकाला मारहाण करत त्यांच्याकडील ८ हजार ९६० रुपयांची रोकड लुटल्याची घटना घडली. या प्रकरणी शिरूर पोलिसांच्या गुन्हे शोध पथकाने चार जणांना अटक केली आहे. अजयकुमार शिनू चव्हाण (२४), सचिन अशोक घोलप (२२), पवन मधुकर घोलप (२५) आणि आकाश सोमनाथ काळे (२१) अशी अटक केलेल्या आरोपींची नावे आहेत. शिरूर न्यायालयाने चौघांना मंगळवार (८ सप्टेंबर)पर्यंत पोलिस कोठडी सुनावली आहे.
ही घटना शुक्रवारी (४ सप्टेंबर) मध्यरात्री दोनच्या सुमारास पुणे-अहिल्यानगर मार्गावरील न्हावरे फाटा येथे घडली. आरोपींनी विनाक्रमांकाची काळ्या रंगाची स्कॉर्पिओ जीप एसटी बससमोर आडवी लावून पुण्याहून शिरूरकडे जाणारी एमएच १४ एनपी ०८३८ क्रमांकाची बस अडवली. त्यानंतर आपल्या जीपला बस घासल्याचा बनाव करून चालक संदीप गणपत थोरवे यांच्याकडे नुकसानभरपाईची मागणी केली.
बसला जीप घासली नसल्याचे चालकाने सांगितल्यानंतर आरोपींनी त्यांना मारहाण करण्यास सुरुवात केली. चालकाला वाचवण्यासाठी वाहक सतीश अण्णासाहेब बाचकर धावून आले असता त्यांनाही मारहाण करण्यात आली. त्यानंतर आरोपींनी वाहकाकडील प्रवाशांच्या तिकिटातून जमा झालेली ८ हजार ९६० रुपयांची रोकड आणि बसची चावी जबरदस्तीने हिसकावून घेतली. बसवर दगडफेक करून आरोपींनी तेथून पळ काढला. आरोपींनी जीपमधून कोयते काढण्याची धमकी दिल्याने बसमधील प्रवाशांमध्येही घबराट निर्माण झाली होती.
घटनेनंतर चालक आणि वाहकांनी शिरूर पोलिस ठाण्यात धाव घेत तक्रार दाखल केली. पोलिस निरीक्षक विनोद पाटील यांनी घटनेची गंभीर दखल घेत गुन्हे शोध पथकाला आरोपींचा शोध घेण्याच्या सूचना दिल्या. पोलिस उपनिरीक्षक शुभम चव्हाण यांच्या नेतृत्वाखाली नीतेश थोरात, विजय शिंदे, नीरज पिसाळ, राहुल वाघमोडे, अंबादास थोरे, निखील रावडे, सचिन भोई, अजय पाटील आणि दादाराव नागरे यांच्या पथकाने तपास सुरू केला.
आरोपींचा माग काढण्यासाठी पोलिसांनी शिरूर परिसरासह अहिल्यानगर, आळंदी, भोसरी आणि निगडी परिसरातील शंभरहून अधिक सीसीटीव्ही कॅमेऱ्यांचे फुटेज तपासले. तांत्रिक विश्लेषणाच्या आधारे संशयितांची माहिती मिळाल्यानंतर पोलिसांनी विविध ठिकाणी सापळे रचून चौघांना ताब्यात घेतले. त्यांच्याकडून गुन्ह्यात वापरलेली काळ्या रंगाची स्कॉर्पिओ (एमएच १४ एनडब्ल्यू ५२३४) जप्त करण्यात आली आहे.
दरम्यान, अटक केलेले आरोपी अहिल्यानगर जिल्ह्यातील एका बड्या राजकीय नेत्याच्या संपर्कात असल्याची माहिती तपासात समोर आल्याचे सांगण्यात येत आहे. या संपर्काचे स्वरूप आणि त्याचा या गुन्ह्याशी काही संबंध आहे का, याबाबत पोलिसांकडून तपास केला जात आहे. पोलिस उपनिरीक्षक शुभम चव्हाण पुढील तपास करीत आहेत.
