बारामती, (पुणे) : बारामती शहर पोलीस आणि अन्न व औषध प्रशासन विभागाने संयुक्तपणे धाड टाकून तब्बल 55 हजार 244 रुपयांचा प्रतिबंधित साठा जप्त केला असून, एका आरोपीला अटक करण्यात आली आहे. गणेश गुरुशांताप्पा गुरुभेट्टी (वय ३८, रा. बारामती) असे अटक करण्यात आलेल्या आरोपीचे नाव आहे. याबाबत अन्न सुरक्षा अधिकारी संदीप दिगंबरराव शिंदे यांनी फिर्याद दिली आहे.
मिळालेल्या माहितीनुसार, 9 जून 2026 रोजी भिगवण रोड, जळोची येथील ‘मे. धानेश्वरी किराणा अॅण्ड जनरल स्टोअर्स’ (शॉप नं. ८५, विश्व एम्पायर) येथे अन्न सुरक्षा अधिकारी संदीप शिंदे, सहकारी अन्न सुरक्षा अधिकारीलक्ष्मीकांत सावळे आणि पंचांच्या उपस्थितीत तपासणी करण्यात आली. या तपासणी दरम्यान दुकानात मोठ्या प्रमाणावर प्रतिबंधित गुटखा आणि पानमसाल्याचा साठा आढळून आला.
कारवाई दरम्यान पोलिसांनी व अन्न सुरक्षा अधिकाऱ्यांनी विविध ब्रँडचा माल जप्त केला. यामध्ये प्रीमियम आर.एम.डी. पानमसाला, एम सेंटेड तंबाखू. डायरेक्टर पान मसाला, विमल पानमसाला व व्ही-1 तंबाखू, गुलाम गुटखा, बाजीगर गुटखा आणि के.आर.1 हजार गुटखा या प्रकरणी दुकान मालक आणि विक्रेता गणेश गुरुभेट्टी याला 10 जून रोजी अटक करण्यात आली आहे. चौकशीदरम्यान, त्याने हा प्रतिबंधित माल कर्नाटक राज्यातून आणल्याची कबुली दिली. मात्र, याबाबत कोणतेही वैध खरेदी बिल किंवा कागदपत्रे तो सादर करू शकला नाही.
पोलिसांनी केवळ किरकोळ विक्रीपुरता तपास मर्यादित न ठेवता, प्रतिबंधित गुटख्याच्या चोरट्या व्यापाराची संपूर्ण पुरवठा साखळी उघड करण्याचा निर्णय घेतला आहे. यातील आर्थिक व्यवहार, वाहतूक व्यवस्था, मुख्य पुरवठादार, वितरक आणि उत्पादक यांच्यापर्यंत तपासाचे जाळे विस्तारित करण्यात आले आहे.
अन्न सुरक्षा अधिकारी संदीप शिंदे यांनी दिलेल्या फिर्यादीवरून बारामती शहर पोलीस ठाण्यात अन्न सुरक्षा व मानके कायदा 2006 अंतर्गत गुन्हा दाखल करण्यात आला आहे. सदर गुन्ह्याचा पुढील तपास पोलीस हवालदार रामचंद्र शिंदे करीत आहेत.
