पुणे: पुण्यात पूर्ववैमनस्यातून तरुणावर गोळीबार करून त्याला जीवे मारण्याचा प्रयत्न केल्याची घटना आंबेगाव परिसरात घडली. या प्रकरणी आंबेगाव पोलिसांनी पाच जणांविरुद्ध खुनाचा प्रयत्न केल्याचा गुन्हा दाखल करून तिघांना अटक केली आहे. शिवदत्त ऊर्फ सोन्या हरीकाका कोंढरे (२३), श्रेयश रुपेश काटे (२३) आणि सुरज सुभाष डिंबळे (२३) अशी अटक केलेल्या आरोपींची नावे आहेत. दगड्या ऊर्फ ऋतिक बेलदरे आणि आतिष ऊर्फ मन्या उमेश मोरे यांच्याविरुद्धही गुन्हा दाखल करण्यात आला आहे.
या घटनेत चंद्रकांत रामदास माने (२१, रा. हरणाई कॉम्प्लेक्स, आंबेगाव) याच्या दिशेने गोळीबार करण्यात आला. याबाबत त्याची आई पोर्णिमा रामदास माने (४३) यांनी आंबेगाव पोलिस ठाण्यात फिर्याद दिली आहे. श्रेयश काटे नोकरी करत असून, इतर आरोपी शिक्षण घेत असल्याची माहिती पोलिसांनी दिली आहे. मन्या मोरे, सोन्या कोंढरे आणि सुरज डिंबळे यांच्यावर यापूर्वीही गुन्हे दाखल असल्याचे पोलिसांनी सांगितले.
पोलिसांनी दिलेल्या माहितीनुसार, चंद्रकांत माने आणि आरोपी एकाच परिसरात राहतात. त्यांच्यात पूर्वी किरकोळ कारणांवरून वाद झाले होते. ५ सप्टेंबर रोजी रात्री दीडच्या सुमारास चंद्रकांत दुचाकीवरून हरणाई कॉम्प्लेक्समध्ये घरी आला. दुचाकी पार्क करून तो जिन्याने दुसऱ्या मजल्यावरील घराकडे जात असताना आरोपीही दुचाकीवरून सोसायटीत आले.
आरोपींनी चंद्रकांतला खाली येण्यास सांगत जीवे मारण्याची धमकी दिली. त्यानंतर त्याच्यावर गावठी पिस्तुलातून गोळीबार करून आरोपी तेथून पसार झाले. सुदैवाने गोळी चंद्रकांतला लागली नाही. घटनेची माहिती मिळताच आंबेगाव पोलिसांनी तपास सुरू करून आरोपींचा शोध घेतला आणि त्यापैकी तिघांना अटक केली.
या प्रकरणाचा पुढील तपास पोलिस उपनिरीक्षक युवराज शिंदे करीत आहेत.
