सासवड, (पुणे) : बोपगाव (ता. पुरंदर) परिसरात एका गोदामावर छापा मारून तब्बल 21 लाख 70 हजार 960 रुपयांचा प्रतिबंधित गुटखा आणि सुगंधित तंबाखूचा साठा सासवड पोलिसांनी जप्त केला आहे. याबबत पोलीस शिपाई प्रणय राजेंद्र मखरे यांनी सासवड पोलीस ठाण्यात फिर्याद दिली आहे.
याप्रकरणी आरोपी सिराज शेख (रा. शितल पेट्रोल पंपाचे शेजारी, कोंढवा खुर्द, पुणे) याच्याविरुद्ध सासवड पोलीस ठाण्यात अन्न सुरक्षा व मानके अधिनियमासह भारतीय न्याय संहितेनुसार गुन्हा दाखल करण्यात आला आहे. या कारवाईमुळे पुरंदर तालुक्यातील गुटखा तस्करांचे धाबे दणाणले आहेत.
पोलिसांनी दिलेल्या माहितीनुसार, गुरुवारी (ता. 25) सव्वा एक वाजण्याच्या सुमारास सासवड पोलिसांना एका गोपनीय बातमीदाराकडून कडक माहिती मिळाली की, बोपगाव येथील कानिफनाथ गडाकडे जाणाऱ्या रोडवरील एका गोदामामध्ये अन्न व औषध प्रशासन मुंबई यांच्या वतीने प्रतिबंधित केलेल्या गुटखा आणि सुगंधित तंबाखूचा मोठा कडक साठा लपवून ठेवण्यात आला आहे.
माहिती मिळताच सासवड पोलीस ठाण्याचे पोलीस निरीक्षक संतोष घोळवे यांच्या मार्गदर्शनाखाली पोलीस उपनिरीक्षक अर्चना पाटील, पोलीस अंमलदार विशाल जाधव, अभिजीत कांबळे, प्रणय मखरे, सचिन किवळे, अक्षय चिले आणि महिला पोलीस अंमलदार पल्लवी काळे यांचे पथक तात्काळ घटनास्थळी रवाना
पोलीस पथकाने बोपगाव येथील त्या संशयास्पद गोदामाची नाकाबंदी करून झडती घेतली असता, तिथे मोठ्या प्रमाणात प्रतिबंधित मालाचे साठे आढळून आले. यामध्ये ‘सिग्नेचर फायनेस्ट पान मसाला’, ‘ॲक्शन 7 कंपनीची सुगंधित तंबाखू’, ‘आर. के. कंपनीचा सम्राट पान मसाला’, ‘आर. के. कंपनीचा एस.टी.-१ सुगंधित तंबाखू’ असा एकूण 21 लाख 70 हजार 960 रुपये किमतीचा मुद्देमाल पोलिसांनी जप्त केला. या गुन्ह्याचा पुढील तपास पोलीस उपनिरीक्षक अर्चना पाटील करत आहेत.
सदरची कारवाई सासवडचे पोलीस निरीक्षक संतोष घोळवे, पोलीस उपनिरीक्षक अर्चना पाटील, पोलीस हवालदार विशाल जाधव, अभिजीत कांबळे, प्रणय मखरे, सचिन किवळे, अक्षय चिले, पल्लवी काळे यांच्या पथकाने केली आहे.
