छत्रपती संभाजीनगर: छत्रपती संभाजीनगरमध्ये एका २३ वर्षीय परिचारिकेची फसवणूक केल्याचा संतापजनक प्रकार समोर आला आहे. लग्नाचे खोटे स्वप्न दाखवून शारीरिक शोषण करणाऱ्या सैन्यातील जवानाला पोलिसांनी त्याच्या हळदीच्या कार्यक्रमातून अटक केली आहे. मयूर कैलास निकाळजे असे या आरोपीचे नाव असून, त्याने पीडितेचा विश्वासघात करून दुसऱ्या मुलीशी विवाह करण्याचा घाट घातला होता. या प्रकारामुळे खचलेल्या पीडितेने आत्महत्येचा मार्ग निवडला होता, मात्र वेळीच उपचार मिळाल्याने तिचा जीव वाचला.
पीडित परिचारिका आणि मयूर यांची भेट नाशिकमधील एका विवाह सोहळ्यात झाली होती. त्यानंतर त्यांच्यात जवळीक वाढून २०२४ मध्ये प्रेमसंबंध जुळले. सप्टेंबर २०२५ मध्ये सुटीवर असताना, मयूरने पडेगाव येथील एका हॉटेलमध्ये तिला बोलावले आणि आयुष्यभर साथ देण्याचे आश्वासन देऊन तिच्यावर शारीरिक अत्याचार केले. काही काळानंतर, १६ जून २०२६ रोजी त्याने अचानकपणे घरच्यांचा दबाव असल्याचे कारण पुढे करत तिच्याशी लग्न करण्यास साफ नकार दिला आणि संबंध तोडले.
आपली स्वप्ने उध्वस्त झाल्याचे पाहून तरुणीने हताश होऊन विष प्राशन केले. तिने मयूरला फोन करून शेवटची माहिती दिली, परंतु त्याने तिला कोणतीही मदत करण्याऐवजी फोन बंद केला. नशिबाने ती मृत्यूच्या दाढेतून वाचली. इकडे पीडिता रुग्णालयात उपचार घेत असताना, आरोपी मयूर दुसऱ्या तरुणीशी लग्न करण्याची तयारी करत होता. त्याच्या अंगावर हळद लागलेली असतानाच छावणी पोलिसांनी तिथे धाड टाकली आणि त्याला अटक केली.
या गंभीर प्रकरणाचा तपास करणारे सहायक पोलीस निरीक्षक विवेक जाधव यांनी स्पष्ट केले की, आरोपीला न्यायालयात हजर करण्यात आले होते, जिथे त्याला ५ दिवसांची पोलीस कोठडी देण्यात आली आहे. छावणी पोलिसांकडून या घटनेचा अधिक तपास केला जात आहे.
