लोणी काळभोर, (पुणे) : पारदर्शक आणि शिस्तबद्ध कारभाराच्या जोरावर आपल्या कामकाजाचा ठसा उमटवणाऱ्या कुंजीरवाडी हद्दीतील थेऊरफाटा येथील ‘श्रीनाथ पतसंस्थेला’ आर्थिक वर्ष 2025-26 मध्ये तब्बल 1.59 कोटी रुपयांचा निव्वळ नफा झाला आहे. या घवघवीत यशाच्या जोरावर संस्थेच्या सर्व सभासदांना 14 टक्के इतका लाभांश जाहीर करण्यात आला असल्याची माहिती संस्थेचे संस्थापक अध्यक्ष संदीप धुमाळ यांनी दिली.
महाराष्ट्र राज्य कार्यक्षेत्र असलेल्या श्रीनाथ पतसंस्थेची 26 वी वार्षिक सर्वसाधारण सभा पुणे-सोलापूर महामार्गावरील थेऊरफाटा येथील ‘हॉटेल एस 4 जी’ येथे रविवारी (ता. 20) उत्साहात आणि सभासदांच्या उदंड उपस्थितीत पार पडली.
यापुढे बोलताना संदीप धुमाळ म्हणाले की, 31 मार्च 2026 अखेर पतसंस्थेकडे 45 कोटी 90 लाख रुपयांच्या ठेवी जमा असून, संस्थेने 35 कोटी 92 लाख रुपयांचे सुरक्षित कर्जवाटप केले आहे. तसेच विविध सुरक्षित मार्गांनी 26 कोटी 49 लाख रुपयांची गुंतवणूक करण्यात आली आहे. सध्या संस्थेचे एकूण खेळते भांडवल 65 कोटी 38 लाख रुपयांवर पोहोचले असून, कर्जाची वसुली 92.21 टक्के इतकी आहे. विशेष म्हणजे, आजच्या आव्हानात्मक सहकार क्षेत्रात श्रीनाथ पतसंस्थेने एनपीए (NPA)शून्य टक्के राखत आर्थिक शिस्तीचा अनोखा आदर्श निर्माण केला आहे.
या वार्षिक सभेचे औचित्य साधून पंचक्रोशीतील गुणवंत विद्यार्थ्यांचा ‘श्रीनाथ गुण गौरव पुरस्कार 2026’ देऊन गौरव करण्यात आला. तसेच, संस्थेच्या प्रगतीत योगदान देणारे ज्येष्ठ सभासद आणि विशेष कार्याबद्दल ज्ञानेश्वर धुमाळ व गणेश आंबेकर यांचा विशेष सन्मान करण्यात आला.
यावेळी सभेच्या अध्यक्षस्थानी अध्यक्ष संदीप धुमाळ, उपाध्यक्ष संभाजी आंबेकर, कार्यकारी संचालक ज्ञानेश्वर धुमाळ, ज्येष्ठ संचालक महादेव धुमाळ, माजी सरपंच सचिन तुपे, परिस फाउंडेशनच्या अध्यक्षा व माजी सरपंच सुनीता धुमाळ, वैशाली मेमाने, राहुल धुमाळ, दीपक खटाटे, सुभाष गाडवे, अजय कुंजीर, राजेंद्र गायकवाड, उमेश राखपसरे, विश्वनाथ रूपनर, पोपट चौधरी, दत्तात्रय कुंजीर आणि व्यवस्थापक शिवाजी जावळे यांच्यासह सर्व संचालक मंडळ व सभासद मोठ्या संख्येने उपस्थित होते. सभेचे अहवाल वाचन व सूत्रसंचालन संस्थेचे कार्यकारी संचालक ज्ञानेश्वर धुमाळ यांनी केले.
