पुणे : शहरातील वाढती वाहनसंख्या आणि पार्किंगसाठी अपुरी जागा लक्षात घेता महापालिका प्रशासनाने सार्वजनिक वाहनतळ धोरणात बदल करण्याचा प्रस्ताव मांडला आहे. नव्या प्रस्तावानुसार रस्त्याबाहेरील पार्किंगच्या मध्यवर्ती भागातील झोन ‘अ’मध्ये दुचाकींसाठी प्रतितास 15 रुपये, तर चारचाकी वाहनांसाठी प्रतितास 30 रुपये शुल्क आकारण्याचे प्रस्तावित करण्यात आले आहे. त्यामुळे सध्याच्या तुलनेत पार्किंगच्या शुल्कात मोठी वाढ होणार आहे.
सध्या रस्त्याबाहेरील पार्किंगसाठी दुचाकींना प्रतितास 1 ते 3 रुपये, तर चारचाकी वाहनांना 7 ते 14 रुपये शुल्क आकारले जाते. नव्या प्रस्तावामुळे दुचाकी आणि चारचाकी वाहनांच्या पार्किंगसाठी नागरिकांना अधिक शुल्क द्यावे लागणार आहे.
याशिवाय रस्त्यावरील पार्किंगसाठीही नवीन दर प्रस्तावित करण्यात आले आहेत. त्यानुसार दुचाकीसाठी प्रतितास 20 रुपये, तर चारचाकी वाहनांसाठी 40 रुपये शुल्क आकारण्याचा प्रस्ताव आहे. मात्र, या दरांची अंमलबजावणी करण्यापूर्वी स्थायी समिती आणि सर्वसाधारण सभेची मंजुरी घेणे आवश्यक आहे. मंजुरी मिळाल्यानंतरच नवीन पार्किंग दर लागू करण्यात येणार आहेत.
शहरात दररोज सुमारे 1 हजार ते 1 हजार 500 नवीन वाहनांची नोंदणी होत असल्याने पार्किंगची समस्या दिवसेंदिवस वाढत आहे. वाढत्या वाहनसंख्येमुळे शहरातील उपलब्ध पार्किंगच्या जागांवरही मोठा ताण निर्माण होत आहे. या पार्श्वभूमीवर महापालिका प्रशासनाने पार्किंग शुल्कात बदल करण्याचा प्रस्ताव मांडला आहे.
पुणे शहराचे सार्वजनिक वाहनतळ धोरण 2018 मध्ये मंजूर करण्यात आले होते. मात्र, सध्याचे पार्किंग शुल्क तुलनेने कमी असल्याने त्यात सुधारणा करण्याची गरज असल्याचे प्रशासनाचे म्हणणे आहे. त्यामुळे नव्या दरांच्या प्रस्तावाला स्थायी समिती आणि सर्वसाधारण सभेची मंजुरी मिळाल्यानंतर शहरातील पार्किंग शुल्कात बदल होण्याची शक्यता आहे.
