शिक्रापूर, ता. 21 : गणेशोत्सव केवळ उत्सवापुरता मर्यादित न ठेवता सामाजिक बांधिलकी जपण्याच्या उद्देशाने एसजीए ग्रुपच्या वतीने रक्तदान शिबिराचे आयोजन करण्यात आले. तळेगाव ढमढेरे (ता. शिरूर) येथील गोवर्धन पॉलिमर इंडस्ट्रीज या कंपनीत आयोजित करण्यात आलेल्या या शिबिरात कंपनीच्या कर्मचाऱ्यांसह पंचक्रोशीतील नागरिकांनी उत्स्फूर्त सहभाग नोंदवला. या शिबिरातून तब्बल 111 रक्तपिशव्यांचे संकलन करण्यात आले.
एसजीए ग्रुपचे सीईओ शंकर गायकवाड यांच्या संकल्पनेतून या रक्तदान शिबिराचे आयोजन करण्यात आले होते. सामाजिक बांधिलकीच्या भावनेतून राबविण्यात आलेल्या या उपक्रमाला नागरिकांनी उत्स्फूर्त प्रतिसाद दिला. यावेळी एसजीए ग्रुपचे संचालक वाल्मिक गायकवाड, गोवर्धन पॉलिमर इंडस्ट्रीजचे संचालक लक्ष्मण दांडगे, आरव इंटरप्रायजेसचे संचालक योगेश जकाते, एसजीए ग्रुपचे डायरेक्टर रवी गिरी, दीपक गाढवे, प्लांट हेड सचिन पाटील, श्री रेपाळ, समिर गिरी, संदीप बर्गे यांच्यासह हिंजवडी ब्लड बँकेचे डॉक्टर आणि कर्मचारी उपस्थित होते.
“अपघातात जखमी झालेल्या रुग्णांसह विविध आजारांनी त्रस्त असलेल्या रुग्णांना अनेकदा तातडीने रक्ताची गरज भासते. अशा वेळी रक्तदानातून एखाद्या गरजू रुग्णाचा जीव वाचण्यास मदत होऊ शकते. याच निःस्वार्थ भावनेतून हा उपक्रम राबविण्यात आला,” अशी माहिती लक्ष्मण दांडगे यांनी दिली.
दरम्यान, एसजीए ग्रुपच्या वतीने आयोजित करण्यात आलेले हे पहिलेच रक्तदान शिबिर असून, भविष्यातही दरवर्षी गणेशोत्सवाच्या काळात हा सामाजिक उपक्रम राबविण्याचा संकल्प करण्यात आला आहे. त्यामुळे गणेशोत्सवाच्या आनंदासोबतच सामाजिक बांधिलकीचा संदेशही या उपक्रमातून देण्यात आला. या समाजोपयोगी उपक्रमाचे सर्वत्र कौतुक होत आहे.
