लोणी काळभोर, ता. 21 : राष्ट्रवादी काँग्रेस पक्षाच्या महिला आघाडीची पूर्व हवेली तालुका अध्यक्ष म्हणून वंदना दत्तात्रय काळभोर (रा. कदमवाकवस्ती, ता. हवेली) यांची नियुक्ती करण्यात आली आहे. पक्ष संघटना बळकट करण्यासाठी आणि महिला आघाडीच्या माध्यमातून पक्षाची ध्येय-धोरणे तळागाळापर्यंत पोहोचविण्याची जबाबदारी त्यांच्यावर सोपविण्यात आली आहे.
तळेगाव ढमढेरे (ता. शिरूर) येथे झालेल्या कार्यक्रमात महाराष्ट्राचे कृषिमंत्री दत्तात्रय भरणे, माजी आमदार रमेश थोरात, महाराष्ट्र प्रदेश राष्ट्रवादी काँग्रेस पार्टीचे उपाध्यक्ष सुरेश घुले, राष्ट्रवादी काँग्रेसच्या महिला प्रदेशाध्यक्ष वैशाली नागवडे, पुणे जिल्हा महिला अध्यक्षा मोनिका हरगुडे आणि हवेली तालुकाध्यक्ष दिलीप वाल्हेकर, युवराज काळभोर यांच्या उपस्थितीत वंदना काळभोर यांना नियुक्तीपत्र देण्यात आले.
पुणे जिल्हा राष्ट्रवादी काँग्रेस महिला अध्यक्षा मोनिका हरगुडे यांनी वंदना काळभोर यांचे अभिनंदन करत, पक्षाची ध्येय-धोरणे, विचार आणि भूमिका सर्वसामान्य जनतेपर्यंत पोहोचविण्यासह महिला संघटना अधिक सक्षम करण्यासाठी त्या सातत्याने प्रयत्न करतील, असा विश्वास व्यक्त केला.
दरम्यान, राष्ट्रवादी काँग्रेसच्या महिला प्रदेशाध्यक्षपदी वैशाली नागवडे यांची ऑगस्ट 2026 मध्ये नियुक्ती झाली असून, त्यानंतर पक्षाच्या महिला संघटनेत विविध पातळ्यांवर नियुक्त्या करण्यात येत आहेत. वंदना काळभोर यांच्या नियुक्तीमुळे पूर्व हवेली तालुक्यातील महिला संघटनेला नवे नेतृत्व मिळाले असून, आगामी काळात तालुक्यातील महिला कार्यकर्त्यांना संघटित करून पक्षाची संघटनात्मक ताकद वाढविण्यासाठी त्या कोणत्या पद्धतीने काम करतात, याकडे कार्यकर्त्यांचे लक्ष लागले आहे.
