पुणे : पोलीस, केंद्रीय अन्वेषण विभाग (सीबीआय) किंवा सक्तवसुली संचालनालय (ईडी)च्या अधिकाऱ्यांची बतावणी करून ज्येष्ठ नागरिकांना डिजिटल अरेस्टच्या जाळ्यात अडकवून मोठ्या प्रमाणात आर्थिक फसवणूक केली जात आहे. पुणे सायबर पोलिसांच्या आकडेवारीनुसार, गेल्या 18 महिन्यांत डिजिटल अरेस्टचे 136 गुन्हे दाखल झाले असून, या प्रकरणांमध्ये ज्येष्ठ नागरिकांची 100 कोटी रुपयांहून अधिक रकमेची फसवणूक झाल्याचे समोर आले आहे.
2025 मध्ये डिजिटल अरेस्टचे 85 गुन्हे दाखल झाले होते. या गुन्ह्यांमध्ये ज्येष्ठ नागरिकांकडून 53 कोटी 52 लाख रुपये उकळण्यात आले. यंदा जुलैअखेरपर्यंत 51 गुन्हे नोंदविण्यात आले असून, या प्रकरणांमध्ये 46 कोटी 27 लाख रुपयांची फसवणूक झाली आहे. मागील वर्षाच्या तुलनेत यंदा गुन्ह्यांची संख्या कमी असली, तरी फसवणुकीची रक्कम मोठी आहे. एका ज्येष्ठ नागरिकाची तब्बल 10 कोटी रुपयांची फसवणूक झाल्याची माहिती सायबर पोलिसांच्या वरिष्ठ निरीक्षक स्वप्नाली शिंदे यांनी दिली.
अलीकडेच एका 82 वर्षीय सेवानिवृत्त व्यावसायिकाची 10 कोटी 74 लाख रुपयांची फसवणूक करण्यात आली. तसेच 87 वर्षीय सेवानिवृत्त अधिकाऱ्याची 3 कोटी 46 लाख रुपयांची फसवणूक झाल्याचे समोर आले आहे. आरोपींनी सीबीआय अधिकारी असल्याचे भासवून संबंधितांना मनी लाँडरिंगच्या गुन्ह्यात अटक करण्याची धमकी दिली. त्यानंतर चौकशीच्या नावाखाली त्यांच्याकडून मोठ्या रकमा विविध बँक खात्यांमध्ये वर्ग करण्यास भाग पाडले.
याच पद्धतीने एका 74 वर्षीय सेवानिवृत्त शिक्षिका आणि त्यांच्या पतीची 68 लाख 80 हजार रुपयांची फसवणूक करण्यात आली. आरोपींनी वरिष्ठ पोलीस अधिकारी असल्याची बतावणी करून या दाम्पत्याला तब्बल महिनाभर डिजिटल अरेस्टमध्ये ठेवल्याचे तपासात समोर आले आहे.
डिजिटल अरेस्टच्या माध्यमातून आरोपींकडून ज्येष्ठ नागरिकांना वेगवेगळ्या गुन्ह्यांमध्ये अडकवण्याची भीती दाखवली जाते. त्यानंतर चौकशी किंवा कायदेशीर कारवाई टाळण्यासाठी पैशांची मागणी केली जाते. अशा प्रकारांमुळे पुण्यातील ज्येष्ठ नागरिक मोठ्या आर्थिक फसवणुकीचे लक्ष्य ठरत असल्याचे या आकडेवारीवरून दिसून येत आहे.
