न्हावरे: पुणे–अहिल्यानगर महामार्गावरून शिरूर शहरात (Shirur Accident) जाणाऱ्या रस्त्यावर एसटी बस व दुचाकी यांच्यात झालेल्या भीषण धडकेत न्हावरे येथील एका तरुणाचा मृत्यू झाल्याची दुर्दैवी घटना शुक्रवारी (दि.१३) सायंकाळी घडली.या घटनेची नोंद शिरूर पोलीस ठाण्यात करण्यात आली आहे. या अपघातात चंद्रकांत जयसिंग भोसले (वय २६,रा.न्हावरे,ता. शिरूर,जि.पुणे) या तरुणाचा मृत्यू झाला. (Shirur News)
मिळालेल्या माहितीनुसार, चंद्रकांत भोसले हा न्हावरे येथील तरुण आर्किटेक्ट असून नुकतेच शिक्षण पूर्ण करून परिसरात आपला व्यवसाय उभा करत होता. शुक्रवारी सायंकाळी पाचच्या सुमारास शिरूर येथे काम आटोपून तो दुचाकीवरून न्हावरेकडे परतत होता. यावेळी तो शिरूर शहरातील नगरपालिका रस्त्याने येऊन मुख्य रस्ता क्रॉस करण्यासाठी दुचाकीवर थांबला असताना, पुणे बाजूकडून भरधाव वेगाने आलेल्या एसटी बसने त्याच्या दुचाकीला जोरदार धडक दिली. या भीषण अपघातात भोसले यांच्या डोक्याला व पायाला गंभीर दुखापत झाली.
स्थानिकांनी तातडीने त्यांना उपचारासाठी शिरूर येथील रुग्णालयात दाखल केले. मात्र उपचारापूर्वीच डॉक्टरांनी त्यांना मृत घोषित केले. या घटनेनंतर चंद्रकांत भोसले यांचे शवविच्छेदन शिरूर येथील रुग्णालयात करण्यात आले.अत्यंत हुशार व अभ्यासू असलेल्या चंद्रकांतने नुकतेच आर्किटेक्टचे शिक्षण पूर्ण करून न्हावरे परिसरात आपला व्यवसाय सुरू केला होता. त्याचा स्वभाव मनमिळावू असल्याने गावात व परिसरात त्याचा मोठा मित्रपरिवार आहे.
या अपघाती मृत्यूमुळे न्हावरे परिसरात हळहळ व्यक्त होत आहे. या प्रकरणी मयत तरुणाचे वडील तथा माजी सैनिक जयसिंग भोसले यांनी शिरूर पोलीस ठाण्यात फिर्याद दिली असून पुढील तपास पोलीस करत आहेत.चंद्रकांत भोसले यांच्या पश्चात वडील व बहीण असा परिवार आहे.
