पिंपरी चिंचवड: पिंपरी चिंचवड महानगरपालिकेच्या ‘ड’ क्षेत्रीय कार्यालयातील एका इंजिनिअरला लाच घेताना अँटी करप्शन ब्युरो (ACB), पुणे पथकाने रंगेहात पकडले आहे. उमेश अरुण लोंढे (वय 28) असे या लाचखोर इंजिनिअरचे नाव आहे. तो महापालिकेच्या ‘ड’ प्रभाग कार्यालयात स्थापत्य अभियांत्रिकी सहाय्यक म्हणून कार्यरत आहे.
नेमके प्रकरण काय?
तक्रारदाराने पिंपळे गुरव येथे तीन मजली इमारत बांधली होती. महापालिकेने हे बांधकाम अनधिकृत असल्याचे सांगत त्यांना नोटीस दिली होती. या नोटिशीविरोधात तक्रारदाराने मुंबई उच्च न्यायालयात याचिका दाखल केली होती. उच्च न्यायालयाने तक्रारदाराला दंड भरून बांधकाम नियमित करून घेण्याचे आदेश दिले होते. त्यानुसार तक्रारदाराने महापालिकेत अर्जही केला होता.
मात्र, या इमारतीवर अतिक्रमण विरोधी कारवाई न करण्यासाठी उमेश लोंढे याने तक्रारदाराकडे ७०,००० रुपयांच्या लाचेची मागणी केली. या इमारतीबाबत तक्रारी असल्याचे सांगून त्याने उच्च न्यायालयाच्या आदेशाकडेही दुर्लक्ष केले. या मागणीमुळे त्रस्त झालेल्या तक्रारदाराने ९ जून २०२६ रोजी पुणे येथील लाचलुचपत प्रतिबंधक विभागाकडे तक्रार नोंदवली.
सापळा रचून केली कारवाई
मिळालेल्या तक्रारीची पडताळणी केल्यानंतर, ११ जून २०२६ रोजी एसीबीच्या पथकाने महापालिकेच्या ‘ड’ क्षेत्रीय कार्यालयाच्या पार्किंगमध्ये सापळा रचला. यावेळी तक्रारदाराकडून ७०,००० रुपये लाच स्वीकारताना उमेश लोंढे याला रंगेहात पकडण्यात आले. या प्रकरणी वाकड पोलीस ठाण्यात भ्रष्टाचार प्रतिबंधक कायद्यान्वये गुन्हा दाखल करण्याची प्रक्रिया सुरू आहे. ही कारवाई पोलीस उप आयुक्त/पोलीस अधीक्षक शिरीष सरदेशपांडे, ला.प्र.वि. पुणे परिक्षेत्र, पुणे व अपर पोलीस अधीक्षक अजीत पाटील, ला.प्र.वि. पुणे, अपर पोलीस अधीक्षक अर्जुन भोसले, ला.प्र.वि. पुणे, यांचा मार्गदर्शनाखाली पुणे लाचलुचपत प्रतिबंधक विभागाने केली.
