पुणे: उन्हाळा सुरू होताच पुणे (Pune Water Crisis) शहरात पाण्याची टंचाई जाणवू लागली असून टँकरच्या मागणीत मोठी वाढ झाली आहे. मागील वर्षांच्या तुलनेत यंदा फेब्रुवारी महिन्यातच टँकरच्या फेऱ्यांमध्ये सुमारे 6500 ने वाढ झाल्याचे आकडे समोर आले आहेत. मार्च महिन्यात तापमान आणखी वाढण्याची शक्यता असल्याने टँकरची मागणी पुढील काळात अधिक वाढेल, असा अंदाज व्यक्त केला जात आहे.
महापालिकेच्या आकडेवारीनुसार, यावर्षी फेब्रुवारी महिन्यात शहरात एकूण 46068 टँकरच्या फेऱ्यांद्वारे पाणीपुरवठा करण्यात आला. गेल्या वर्षी 2024-25 च्या फेब्रुवारी महिन्यात ही संख्या 39488 इतकी होती, तर 2023-24 च्या फेब्रुवारीमध्ये 33951 टँकरद्वारे पाणीपुरवठा करण्यात आला होता. त्यामुळे यंदा टँकरच्या मागणीत लक्षणीय वाढ झाल्याचे स्पष्ट दिसत आहे.
उन्हाळ्याच्या काळात शहरातील काही उपनगरांमध्ये पाणीपुरवठा अपुरा पडत असल्याने टँकरवर मोठ्या प्रमाणात अवलंबून राहावे लागते. विशेषतः धनकवडी, कात्रज, कोंढवा, येवलेवाडी, किरकिटवाडी, वडगाव बुद्रुक, धायरी, वाघोली, धानोरी, लोहगाव, सूस आणि पाषाण या भागांमध्ये टँकरची मागणी वाढत आहे. नव्याने समाविष्ट झालेल्या गावांमध्ये पाणी वितरणाची यंत्रणा अद्याप पूर्णपणे विकसित नसल्यानेही टँकरवर अवलंबित्व वाढले आहे.
महापालिकेकडून ज्या भागात नियमित पाणीपुरवठा होत नाही किंवा कमी दाबाने पाणी येते, त्या भागांना टँकरद्वारे मोफत पाणीपुरवठा केला जातो. याशिवाय नागरिकांच्या मागणीनुसार ठरावीक शुल्क आकारूनही टँकरद्वारे पाणी पुरवले जाते. खासगी टँकरचालकांनाही महापालिकेकडून शुल्क भरून पाणी घेण्याची परवानगी दिली जाते.
टँकर भरण्यासाठी पर्वती, वडगाव शेरी, धायरी, रामटेकडी, चतु:श्रुंगी, पद्मावती आणि पटवर्धन बाग येथे महापालिकेने सात टँकर पॉइंटची व्यवस्था केली आहे. या ठिकाणांवरून महापालिकेचे तसेच ठेकेदारांचे टँकर शहरातील विविध भागात पाणीपुरवठा करतात. यावर्षी जानेवारी महिन्यात 42542 टँकरद्वारे पाणीपुरवठा झाला होता, तर फेब्रुवारीमध्ये ही संख्या वाढून 46068 वर पोहोचली आहे. वाढत्या उन्हामुळे येत्या काही आठवड्यांत ही मागणी आणखी वाढण्याची शक्यता व्यक्त केली जात आहे.
