Murder News जौनपूर, ता. 2 : लग्नासाठी निघालेल्या नवरदेवावर भररस्त्यात गोळीबार करून हत्या करण्यात आल्याची धक्कादायक घटना समोर आली आहे. फुलांनी सजवलेल्या गाडीतून आयुष्याच्या नव्या प्रवासाला निघालेल्या आझाद बिंद याच्यावर दुचाकीवरून आलेल्या हल्लेखोरांनी हायवेवर अंदाधुंद गोळीबार केला. या हल्ल्यात गंभीर जखमी झालेल्या आझादला रुग्णालयात नेण्यात आले, मात्र डॉक्टरांनी त्याला मृत घोषित केले. या घटनेने लग्नघरावर दु:खाचे सावट पसरले आहे. Murder News
पोलिसांच्या प्राथमिक तपासात या हत्येमागे वैयक्तिक वाद असल्याची शक्यता व्यक्त करण्यात आली आहे. आझादचे लग्न बीबीपुर येथील एका तरुणीशी ठरले होते. मात्र, या विवाहाला तिच्या नातेवाईकाकडून विरोध असल्याची माहिती समोर आली आहे. त्याच पार्श्वभूमीवर कट रचून ही हत्या करण्यात आल्याचा संशय पोलिसांनी व्यक्त केला आहे. Murder News
तपासादरम्यान काही संशयितांच्या हालचाली आणि संपर्कांची चौकशी करण्यात येत असून, मोबाईल लोकेशनच्या आधारे हल्लेखोरांनी नवरदेवाच्या गाडीचा मागोवा घेतल्याचे उघड झाले आहे. हायवेवर संधी साधून गोळीबार करून आरोपी फरार झाले. Murder News
या प्रकरणी संबंधित संशयितांविरुद्ध गुन्हा दाखल करण्यात आला असून पोलिसांनी त्यांचा शोध घेण्यासाठी विशेष पथके तैनात केली आहेत. फरार आरोपींवर बक्षीसही जाहीर करण्यात आले असून, लवकरच त्यांना अटक केली जाईल, असा विश्वास पोलिसांनी व्यक्त केला आहे.
दरम्यान, ज्या घरात लग्नाचा जल्लोष सुरू होता, तिथे अचानक शोककळा पसरली असून परिसरात हळहळ व्यक्त केली जात आहे. या घटनेमुळे कायदा-सुव्यवस्थेवरही प्रश्नचिन्ह उपस्थित होत आहे. Murder News
