पुणे: पुण्यातील फिटनेस क्षेत्रातून धक्कादायक प्रकार समोर आला आहे. चतुःशृंगी पोलिसांनी जनवाडी परिसरात कारवाई करत एका जिम ट्रेनरकडून बेकायदेशीरपणे विकली जाणारी प्रतिबंधित इंजेक्शन्स जप्त केली आहेत. शरीरयष्टी वाढवण्यासाठी काही तरुणांकडून वापरल्या जाणाऱ्या ‘मेफेन्टरमाइन सल्फेट’ या औषधाची विनापरवाना विक्री सुरू असल्याचे तपासात समोर आले आहे.
या प्रकरणी पोलिसांनी योगेश राजेंद्र वाडेकर (वय 37, रा. जनवाडी, पुणे) या जिम ट्रेनरविरोधात गुन्हा दाखल केला आहे. पोलिसांना जनवाडी परिसरातील महालक्ष्मी मेडिकलजवळ प्रतिबंधित औषधांची विक्री होत असल्याची माहिती मिळाली होती. त्यानंतर चतुःशृंगी पोलीस ठाण्याच्या पथकाने नियोजन करून घटनास्थळी छापा टाकला.
या कारवाईदरम्यान पोलिसांनी योगेश वाडेकर याच्याकडून ‘मेफेन्टरमाइन सल्फेट’ इंजेक्शनच्या 48 बाटल्या जप्त केल्या आहेत. कोणतीही वैद्यकीय परवानगी नसताना आणि डॉक्टरांच्या प्रिस्क्रिप्शनशिवाय ही औषधे विकली जात असल्याचे पोलिसांच्या तपासात निष्पन्न झाले आहे.
पोलिसांच्या प्राथमिक तपासानुसार, जिममध्ये येणाऱ्या तरुणांना कमी वेळेत आकर्षक शरीरयष्टी मिळवून देण्याचे आमिष दाखवून ही इंजेक्शन्स विकली जात होती. अधिक पैसे कमावण्याच्या उद्देशाने हा प्रकार सुरू असल्याचा पोलिसांचा संशय आहे.
फिटनेस क्षेत्रात शरीर पटकन बनवण्याच्या नादात अनेक तरुण अशा धोकादायक औषधांच्या आहारी जातात. मात्र डॉक्टरांच्या सल्ल्याशिवाय अशा इंजेक्शन्सचा वापर केल्यास गंभीर आरोग्य समस्या निर्माण होऊ शकतात. शरीरावर विपरीत परिणाम होण्याची शक्यता असल्याने तज्ज्ञांकडूनही याबाबत वारंवार सावधानतेचा इशारा दिला जातो.
दरम्यान, पोलिसांनी या प्रकरणी संबंधित जिम ट्रेनरविरोधात गुन्हा दाखल केला असून, ही इंजेक्शन्स कुठून आणली जात होती आणि यामध्ये आणखी कोणाचा सहभाग आहे का, याचा तपास सुरू केला आहे.
