छत्रपती संभाजीनगर: छत्रपती संभाजीनगरमध्ये माणुसकीला काळिमा फासणारी एक अत्यंत संतापजनक घटना उघडकीस आली आहे. दोन सख्ख्या भावांनी मिळून सातवीत शिकणाऱ्या एका अल्पवयीन मुलीवर सामूहिक बलात्कार केल्याचा प्रकार समोर आला आहे. या घटनेमुळे संपूर्ण परिसरात तीव्र संताप व्यक्त होत असून, पोलिसांनी दोन्ही आरोपींना अटक केली आहे.
कृष्णा सोळुंके आणि किशोर सोळुंके या दोन आरोपी भावांची पीडित मुलीशी आधीपासून ओळख होती. याच ओळखीचा गैरफायदा घेत आरोपींनी मुलीला एका खोलीवर नेले. तिथे तिला शीतपेयातून नशेचे औषध देऊन बेशुद्ध केले आणि त्यानंतर तिच्यावर सामूहिक अत्याचार केला. इतकेच नाही, तर या क्रूर कृत्याचे त्यांनी मोबाईलमध्ये नग्न फोटो आणि व्हिडिओ काढले.
अत्याचार करून न थांबता, या नराधमांनी पीडितेच्या आत्याला हे व्हिडिओ व्हॉट्सॲपवर पाठवून बदनामी करण्याची धमकी दिली. व्हिडिओ व्हायरल न करण्यासाठी त्यांनी कुटुंबाकडे लाखो रुपयांची खंडणी मागितली. या प्रकारामुळे पीडित कुटुंब प्रचंड दहशतीखाली होते.
कुटुंबाने दाखवलेल्या धाडसामुळे हा प्रकार पोलिसांपर्यंत पोहोचला. उस्मानपुरा पोलीस ठाण्यात पोक्सो (POCSO) कायदा, सामूहिक बलात्कार आणि खंडणीचा गंभीर गुन्हा दाखल करण्यात आला. पोलिसांनी तांत्रिक तपास आणि मोबाईल लोकेशनच्या आधारे टीव्ही सेंटर भागातील एका बारमधून दोन्ही आरोपींना मद्यधुंद अवस्थेत ताब्यात घेतले.
सध्या या प्रकरणाचा अधिक तपास पोलीस करत असून, या नराधमांना कठोरात कठोर शिक्षा व्हावी, अशी मागणी नागरिकांकडून केली जात आहे. अल्पवयीन मुलींच्या सुरक्षिततेचा प्रश्न या घटनेमुळे पुन्हा एकदा गंभीरपणे समोर आला आहे.
