इराण: अमेरिका आणि इराण यांच्यात सध्या सुरू असलेल्या शांतता वाटाघाटींदरम्यान एक अत्यंत धक्कादायक माहिती समोर आली आहे. इराणचे परराष्ट्र मंत्री अब्बास अराघची आणि संसदेचे अध्यक्ष मोहम्मद बाघेरी गालिबाफ यांना लक्ष्य करण्याचा इस्रायलचा एक मोठा कट अमेरिकेच्या गुप्तचर यंत्रणांनी उधळून लावला आहे. अहवालानुसार, या दोन्ही नेत्यांना संपवण्यासाठी इस्रायलने चक्क २ फायटर विमाने सज्ज केली होती, मात्र अमेरिकेने वेळीच हस्तक्षेप करत हा संभाव्य हल्ला रोखला.
शांतता प्रक्रियेत कोणताही अडथळा येऊ नये आणि दोन्ही देशांमधील तणाव वाढू नये, यासाठी अमेरिका आग्रही आहे. एप्रिल महिन्यात जेव्हा युद्धविराम चर्चेला सुरुवात झाली, तेव्हापासूनच हे दोन्ही नेते इस्रायलच्या ‘हिट लिस्ट’वर असल्याचे सांगितले जाते. डोनाल्ड ट्रम्प प्रशासनाने देखील इस्रायलला स्पष्ट निर्देश दिले होते की, या शांतता चर्चेच्या काळात कोणत्याही प्रकारची आक्रमक कारवाई केली जाऊ नये.
यातील सर्वात थरारक प्रसंग एप्रिलमध्ये घडला. जेव्हा गालिबाफ हे पाकिस्तानचा दौरा संपवून परतत होते, तेव्हा इस्रायलची २ फायटर जेट्स इराणच्या हवाई हद्दीत शिरली होती. गालिबाफ यांच्या विमानावर हल्ला करण्याची योजना असल्याचे समजताच मोठी खळबळ उडाली होती. जीविताची हानी टाळण्यासाठी गालिबाफ यांच्या विमानाचे तातडीने ‘मशहद’ येथे इमर्जन्सी लँडिंग करण्यात आले. त्यानंतर हे संपूर्ण शिष्टमंडळ सुरक्षिततेच्या कारणास्तव रस्ते मार्गाने तेहरानला रवाना झाले.
सध्याची ही परिस्थिती जागतिक राजकारणाच्या दृष्टीने अत्यंत संवेदनशील मानली जात असून, येणाऱ्या काळात या घटनांचा काय परिणाम होतो, याकडे जगाचे लक्ष लागले आहे.
